विदेशी लगानी भित्र्याउन तीन वर्षदेखि रोकिएको कन्ट्री रेटिङको काम अघि बढाइने

१ जेठ, काठमाडौं । सरकारले निजी पुँजी आकर्षित गर्ने र विदेशी लगाउन भित्र्याउन पहल गर्ने घोषणा गरेको छ । आर्थिक विकासका लागि उद्योगी  व्यवसायीहरूको मनोबल उच्च राख्ने गरी कार्यक्रमहरू अघि बढाउने पनि उल्लेख गरेको छ ।

राष्ट्रपति रामचन्द्र पौडेलले मंगलबार संघीय संसदमा पेश गरेको आर्थिक वर्ष २०८१/०८२ को वार्षिक नीति तथा कार्यक्रममा बन्द उद्योग कलकारखाना खुलाउने तथा रुग्ण संस्थानहरूलाई सार्वजनिक निजी साझेदारी अनुरुप व्यवस्थापन गर्ने उल्लेख छ । 

आगामी आर्थिक वर्ष कन्ट्री रेटिङ गरिने भएको छ । मंगलबार संसद्को संयुक्त बैठकमा आगामी आर्थिक वर्षको नीति तथा कार्यक्रम प्रस्तुत गर्दै राष्ट्रपति पौडेलले यस्तो बताएका हुन् । तेस्रो लगानी सम्मेलनअघि कन्ट्री रेटिङ गरिसक्ने बताए पनि सम्पन्न हुन सकेको थिएन । यद्यपि गत वैशाख १५ मा अर्थमन्त्री वर्षमान पुनले तीन वर्षदेखि रोकिएको कन्ट्री रेटिङको काम सुरु भएको बताएका थिए ।

मुलुकको लगानी जोखिमको अवस्थाबारे यथार्थ जानकारी लिन सोभरेयन क्रेडिट रेटिङ गर्ने गरिन्छ । वैदेशिक लगानीकर्ताले लगानीको पूर्वसर्तका रुपमा सोभरेन क्रेडिट रेटिङलाई लिने गरेका छन् । क्रेडिङ रेटिङ नहुँदा अन्तर्राष्ट्रिय विकास साझेदारबाट नेपालले हालसम्म ठूला पूर्वाधारका लागि व्यापारिक ऋण लिन सकेको छैन ।

वैदेशिक लगानी बढाउने उद्देश्यले सरकारले आर्थिक वर्ष २०७५÷०७६ को बजेटमार्फत सरकारले सार्वभौम क्रेडिट रेटिङ गर्ने घोषणा गरेको थियो ।