नदीहरूमा जलमार्ग बनाएर पानीजहाज चलाइने, कोरिडोर निर्माणमा विशेष ध्यान दिने

१ जेष्ठ, काठमाडौं । सरकारले आगामी आर्थिक वर्षमा जल यातायातको प्रयोगका लागि संस्थागत र प्रक्रियागत व्यवस्था गर्ने घोषणा गरेको छ । नीति तथा कार्यक्रममा सुनकोशी र नारायणी नदीमा टर्मिनलसहितको जलमार्ग निर्माण गरिने योजना छ । 

समुद्रमा संचालन हुने पानी जहाज नेपालमा दर्ता हुने व्यवस्था मिलाउने सरकारको नीति तथा कार्यक्रममा उल्लेख छ । आगामी आर्थिक वर्षमा कालीगण्डकी कोरिडोर र कर्णाली करिडोरको अधिकांश सडक खण्डलाई बाह्रै महिना चल्ने गरी निर्माण सम्पन्न गर्ने भएको छ ।

रणनीतिक महत्वको सेती लोकमार्ग र महाकाली कोरिडोर सडकको ट्याक तथा संरचना निर्माणमा प्राथमिकताका साथ अगाडि बढाउने घोषणा गरिएको छ । यस्तै तमोर कोरिडोर, भेरी कोरिडोर, सालझण्डी–ढोरपाटन सहिदमार्ग तथा कान्ति राजमार्गको निर्माण र स्तरोन्नतिलाई निरन्तरता दिने सरकारले जनाएको छ ।