पोखराको प्राईम सहकारीबाट डेढ अर्ब रकम हिनामिना गरेको आरोपमा अध्यक्षसहित ८ जना पक्राउ

१ जेठ, पोखरा । कास्कीको प्राइम बहुउद्देश्यीय सहकारीले साढे १ अर्बभन्दा बढी रकम हिनामिना गरेको पाइएपछि अध्यक्षसहित ८ जना पक्राउ परेका छन् ।  पक्राउ पर्नेहरूमा सहकारीका अध्यक्ष शंकर कार्की, निवर्तमान अध्यक्ष निदेशप्रसाद कोइराला, व्यवस्थापन निरु थापा केसी, कर्मचारी प्रमुख सुरेन्द्रमणी पौडेल, कानुनी सल्लाहकार इन्द्रप्रसाद बराल, पूर्व कोषाध्यक्ष कुलदीप भट्टराई, कर्जा अधिकृत सुनिल थापा र शेयर सदस्य एवं सल्लाहकार मान बहादुर गुरुङ रहेका छन् । 

सहकारी रजिस्ट्रारको कार्यालय पोखराले गरेको अनुसन्धानमा पोखरा महानगरपालिका वडा नं. ४ गैह्रापाटनमा रहेको प्राइम सहकारीले १ अर्ब ५४ करोड १५ लाख ८ हजार एक सय ४२ रुपैयाँ हिनामिना गरेको निष्कर्ष निकालेको थियो । सोही आधारमा जिल्ला प्रहरी कार्यालय कास्कीले आज सहकारीका अध्यक्षसहित ८ जनालाई पक्राउ गरेको कास्कीका सूचना अधिकारी डिएसपी बसन्त कुमार शर्माले जानकारी दिए ।  उनीहरूमाथि थप अनुसन्धान भइरहेको शर्माले बताए ।