संसद अवरोध हटाउन सत्ता पक्षका तीन नेता छलफलमा

२ जेठ, काठमाडौं । भोलि बिहीबार बिहान ११ बजे बोलाइएको प्रतिनिधि सभाको बैठकअघि नेपाली कांग्रेसलाई कसरी मनाउने भन्नेबारे सत्तापक्षका तीन नेता छलफलमा जुटेका छन् । संसदमा देखिएको अवरोध हटाउनेबारे छलफल प्रधानमन्त्री पुष्पकमल दाहाल प्रचण्डले तीन नेताको छलफल राखेका हुन् । 

प्रधानमन्त्री प्रचण्ड, एमाले अध्यक्ष केपी शर्मा ओली र उपप्रधान तथा गृहमन्त्री रवि लामिछानेबीच संसदको अवरोध हटाउने विषयमा आज नयाँ निर्णय गर्ने बताइएको छ । प्रधानमन्त्री प्रचण्ड र गृहमन्त्री लामिछाने र एमाले अध्यक्ष ओलीबीच छलफल भइरहेको बताइएको छ । 

प्रमुख प्रतिपक्षी दल नेपाली कांग्रेसले सहकारी ठगी प्रकरणमा गृहमन्त्री लामिछानेमाथि छानबिन गर्न संसदीय छानबिन समितिको माग गर्दै संसद अवरोध गरिरहेको छ । कांग्रेसले संसदीय छानबिन समितिलाई बटमलाइन बनाएर संसदको अवरोध जारी राखेपछि सरकार अप्ठ्यारोमा परेको छ ।

प्रतिनिधिसभाको बैठक भोलि विहान (विहिबार) ११ बजेको लागि बोलाईएको छ ।  प्रधानमन्त्री प्रचण्ड कांग्रेसलाई चित्त बुझाउने गरि सहकारी ठगी प्रकरणको छानबिनको लागि संसदीय समिति बनाउन सकिनेमा लचिलो भएपनि एमाले र रास्वपा विपक्षमा भएकाले सरकार अप्ठ्यारोमा परेको हो ।