बहुविवाहका आरोपी दाङका पौडेल पुर्पक्षका लागि कारागार चलान

२ जेठ, तुलसीपुर। दाङमा बहु विवाह गरेका एकजना आरोपीलाई अदालतले पुर्पक्षका लागि कारागार चलान गरेको छ । दाङ जिल्ला अदालतले घोराही १५ तुलसीपुर चोक निवासी सरोज पौडेललाई बहु विवाहको आरोपमा पुर्पक्षका लागि कारागार चलान गर्ने आदेश गरेको हो । पौडेल मुद्दा दर्ता भएपछि भागेका थिए ।

जिल्ला प्रहरी कार्यालय दाङले पौडेललाई फरार सूचीमा राखेर घटना बारे अनुसन्धान गरेर जिल्ला सरकारी वकिल कार्यालय घोराहीलाई फाइल बुझाएको थियो । आफैं फरार रहेका पौडेल गएको वैशाख २५ गते अदालतमा हाजिर भएका थिए । जिल्ला न्यायाधीश तारा शर्माको एकल इजलाशले थुनछेकका क्रममा मुद्दाको अन्तिम टुङ्गो नलाग्दासम्म पौडेललाई तत्कालको प्रमाणको आधारमा पुर्पक्षका लागि कारागार चलान गर्ने आदेश गरेको हो ।

पौडेललाई अदालतको आदेश अनुसार कारागार बुझाइएको जिल्ला प्रहरी कार्यालय दाङका डीएसपी जनकबहादुर मल्लले बताए । अदालतले आफ्नो जेठी पत्नी हुँदाहुँदै सम्बन्धविच्छेद नगरेर विदेश जाने लोभमा कान्छी श्रीमतीसँग विवाह गरेर सम्बन्धविच्छेद गरेको कागजलाई प्रमाणको रुपमा लिएको छ । अदालतमा पीडित महिलाले आफूलाई कुटपिट गरेर खान लाउन नदिई घरबाट निकाला गरेको बयान दिएकी छिन् । 

यसअघि प्रहरी र सरकारी वकिललाई दवाव दिएर पौडेललाई बहुविवाहको आरोपबाट उन्मुक्ति दिने प्रयास गरिएको थियो । जिल्ला सरकारी वकिल कार्यालय दाङले पनि बहुविवाह गरेको आरोपी विरुद्ध मुद्दा नचलाउने निर्णय गरेको थियो । यस बारेमा सञ्चारमाध्यममा समाचार प्रकाशित भएपछि उच्च सरकार वकिल कार्यालयले जिल्ला सरकारी वकिलको निर्णय उल्ट्याउँदै घटना अनुसन्धान गरेर मुद्दा दर्ता गर्न निर्देशन दिएको थियो ।

प्रहरीले बहु विवाहको आरोपी छोरालाई उपस्थित नगराएपछि पौडेलका बाबु केशव पौडेललाई मुद्दा चलाउन खोजेको थियो ।  बाबुलाई मुद्दा चलाउन इन्कार गरेपछि सरकारी वकिल कार्यालय घोराहीका प्रमुखले छोरालाई फरार सूचीमा राखेर कारवाही अघि बढाउन प्रहरीलाई निर्देशन दिएका थिए ।