एपीएफ ललितपुर मेयर्स कपको फाइनलमा

२ जेठ, काठमाडौं । सशस्त्र प्रहरी बलको (एपीएफ) क्लब ललितपुर मेयरर्स कप क्रिकेटको फाइनलमा पुगेको छ । बुधवार भएको खेलमा आयोजक ललितपुर मेयर्स–११ लाई पराजित गर्दै एपीएफ फाइनलमा पुगेको हो ।

कीर्तिपुरस्थित टियु क्रिकेट मैदानमा सम्पन्न खेलमा ललितपुरलाई ८ विकेटले पराजित गर्दै एपीएफ एक खेलअघि नै फाइनलमा पुगेको छ । यस खेलमा ललितपुरले दिएको ७२ रनको लक्ष्य पछाएको एपीएफले ९.५ ओभरमा २ विकेट गुमाउँदै लक्ष्य पूरा गरेको थियो । 

यसअघि टस जितेर पहिला ब्याटिङ गरेको ललितपुरले निर्धारित २० ओभरमा ५ विकेट गुमाउँदै ७१ रन बनाएको थियो ।  एपीएफले ३ खेलमा सबै खेल जितेर ६ अङ्कसहित शीर्ष स्थानमा रहेको छ । त्यस्तै सुदूरपश्चिमले २ खेलमा ४ अङ्क बटुलेको छ भने ललितपुरको ३ खेलमा २ अङ्क रहेको छ भने कोशी प्रदेश र बागमती प्रदेश २-२ खेल खेलेर अंकविहीन रहेका छन् ।