संसद विघटन गराउने लक्ष्य बोकेका ओलीको धम्कीले कांग्रेस डराउने वाला छैनः शेखर कोइराला

३ जेठ, काठमाडौं । नेपाली कांग्रेसका वरिष्ठ नेता डा. शेखर कोइरालाले नेकपा एमालेका अध्यक्ष केपी शर्मा ओलीलाई संसद विघटनको बाटोमा लागेर कांग्रेसलाई नधम्क्याउन चेतावनी दिएका छन् । यो प्रतिनिधिसभालाई विघटनको स्थितिमा पुर्याएर पहिलेको संसद विघटन सही थियो भन्ने कुरा पुष्टि गराउन ओलीले खोजिरहेको भन्दै कोइरालाले ओलीको धम्कीले कांग्रेस नडराउने बताए ।  

बिहीबार पार्टी निकट बुद्धिजीवी संगठन प्रजातान्त्रिक विचार समाजको कार्यक्रममा उनले ओलीले सरकार गठनको प्रक्रिया धारा ७६ (३), धारा ७६ (५) हुँदै प्रतिनिधिसभा विघटनसम्म पुर्याउन खोजेको बताए । यही उद्देश्य राखेर ओलीले सरकारी ठगीमा संसदीय छानबिन समिति बनाउन नमानेको उनले बताए । कांग्रेसलाई धाकधम्की देखाएर उद्देश्यमा पुग्न सकिन्छ भन्ने कुरा नसोच्न उनले चेतावनी दिए । 

कांग्रेसले आज जनतासँग जोडिएको सहकारीमा भएको ठगीलाई छानबिन गरौँ भन्दा अरु कारणले ओलीले नमान्नुपर्ने स्थिति नदेखिएको बताए । उनले भने, ‘हामीले सरकारी ठग्नेहरूलाई छानबिन गरेर कारवाहीको दायरामा ल्याउन संसदीय समिति बनाऔँ भनेका हौँ । सरकारी ठगीमा उपप्रधान एवं गृहमन्त्रीको पनि नाम आयो । उहाँको विषय पनि समितिले प्रष्ट पार्छ । समिति भएपछि सबैको छानबिन हुन्छ भनेर भनेका हौँ ।’ 

उनले कांग्रेसले रविको मात्र छानबिन हुनुपर्छ र रविले गृहमन्त्रीबाट राजीनामा दिनुपर्छ भन्ने विषय नउठाएको बताए । सत्ता पक्षका नेताहरूले रविलाई केन्द्र विन्दुमा राखेर कांग्रेसले समिति माग्यो भनिरहेका छन्, त्यो गलत हो । हामीले समग्र सहकारीको ठगीमाथि छानविन हुनैपर्छ भनेको हो । कोइरालाले रवि लामिछाने गृहमन्त्री भएको र उनी सहकारी ठगीमा संलग्न भएको कुरा सडकबाट आएको बताए । आरोप लागेपछि आफै नेतृत्वमा बस्ने र छानविन गराउँछु भन्ने कुरा नमिल्ने उनको भनाइ छ ।      

कोइरालाले संसदमा द्वन्द्व गराएर ओली आफ्नो अभीष्ट पुरा गर्ने सोचमा अगाडि बढिरहेको बताए । आफू गल्ती गर्ने अनि कांग्रेसमाथि धाक धम्कीको भाषा बोल्ने कुरा सहि नहुने उनको भनाइ छ । ओलीको तल्लो स्तरको भाषाले कांग्रेस नडराउने भन्दै कोइरालाले संविधानका धारा केलाएर ओली संसद विघटनको बाटोमा हिँडिरहेको बताए । एमाले ७६(३) धारा उपधारामा जान खोजिरहेको छ, प्रचण्ड जीलाई थाहा छ कि छैन म भन्न सक्दिन ७६ (३) मा गइसकेपछि (ओली) कसैलाई स्वीकार्ने पक्षमा हुनुहुन्न’ उनले भने ।

संविधानको धारा ७६ (३) मा प्रतिनिधिसभाको सबैभन्दा ठूलो दलको संसदीय दलको नेता प्रधानमन्त्री हुन सक्ने व्यवस्था छ । तर उनले विश्वासको मत लिन नसकेमा धारा ७६ (५) अनुसार सरकार गठन हुन्छ, जसमा प्रतिनिधिसभामा विश्वासको मत लिन सक्ने कुनै संसद सदस्य प्रधानमन्त्री हुने व्यवस्था छ । धारा ७६ (३) पछि ५ मा जान्छ, उहाँले संसद विघटन गरिकन दुई अढाइ वर्ष पहिले संसद विघटन गरेको पुष्टि गर्न उहाँ उद्धत हुनुहुन्छ, यसमा कुनै शंका गरिरहनु पर्दैन, उनले भने । 

अब कांग्रेसले यसलाई रोक्न लाग्नुपर्ने उनले बताए । नेता कोइरालाले संघीय सरकार र प्रदेश सरकारको धेरै कमजोर भएका कारण न्यायिक सक्रियता बढेको बताएका छन् । अति न्यायिक सक्रियता संविधानका लागि पनि घातक हुने उनले बताए । प्रदेश र संघका सरकार यति कमजोर भएछौं, त्यसले जुडिसियल एक्टिभिजम यति धेरै बढेको छ, त्यसको हिसाब किताब छैन । जुडिसियल एक्टिभिजमले संविधानलाई केयर गर्दैन, त्यतातिर पनि ध्यान दिएर अगाडि जानुपर्छ, उनले भने ।