सत्तापक्ष गम्भीर भएन, संसद अवरोध हुन्छः कांग्रेस

३ जेठ, काठमाडौं । नेपाली कांग्रेसले सहमतिका लागि सत्ता पक्ष तयार नभएकाले संसद अवरोध गर्ने पार्टीको निर्णय यथावतै रहेको बताएको छ । कांग्रेसले सरकारले सदनको अवरोध खुलाउन प्रयास नगरेको र अल्झाएर राख्ने नियत लिएर छलफलमा प्रस्तुत भइरहेको बताएको छ । 

सहकारीको रकम अपचलनमा गृहमन्त्रीको संलग्नताबारे छानबिनका लागि सरकार तयार नभएको भन्दै कांग्रेसले संसदको अवरोध जारी रहने बताएको हो । सहकारीको रकम अपचलनमा गृहमन्त्रीको संलग्नतासहित छानबिन गर्न संसदीय समिति गठन हुनुपर्छ । गृहमन्त्रीको नाम नहुने गरी संसदीय समिति गठनको प्रस्ताव स्वीकार नहुने कांग्रेसले जनाएको छ ।  

कांग्रेसले सहकारीको रकम अपचलनको विषयमा छानबिनका लागि सरकारलाई छानबिन समितिको मस्यौदा पनि पठाएको थियो । तर, बिहीबार भएका सबै छलफलमा सरकार समिति बनाउन तयार नभएपछि संसद अवरोध जारी राख्ने निर्णयमा पुगेको कांग्रेस प्रवक्ता प्रकाशशरण महतले बताएका छन् । 

सिंहदरबारस्थित कांग्रेस प्रमुख सचेतक रमेश लेखकको कार्यकक्षमा बसेको बैठकले छानबिन समिति कस्तो बनाउने भनेर सरकारलाई पार्टीका तर्फबाट मस्यौदा पठाएको जनाएको हो । प्रवक्ता डा. महतले सदन खुलाउने विषयमा सरकारसँग कुनै छलफल सकारात्मक नभएको बताएका छन् । ४ बजे बस्ने प्रतिनिधि सभाको बैठकअघि सहमति जुटाउने विभिन्न विकल्पमा छलफल सकारात्मक नभएको उनको भनाइ छ ।