बलात्कारको जाहेरी परेपछि एमाले नेता विदुर शर्मा फरार

३ जेठ, काठमाडौं । नेकपा एमाले दोलखाका नेता विदुर शर्मा फरार भएका छन्। एक युवतीले प्रहरीमा जवरजस्ती करणीको जाहेरी दिएपछि शर्मा फरार भएका हुन्। भक्तपुर सूर्यविनायक २ बालकोट बस्दै आएका शर्मालाई प्रहरीले खोजी गरिरहेको छ।

प्रहरी वृत्त दरबारमार्गमा युवतीले शर्माविरुद्ध जवरजस्ती करणीको जाहेरी दिएकी थिइन्। जाहेरी परेपछि खोजीमा रहेको प्रहरीले शर्मा कहाँ छन् पत्ता लगाउन सकेको छैन। जिल्ला प्रहरी परिसर काठमाडौंका प्रमुख प्रहरी वरिष्ठ उपरीक्षक वसन्त रजौरेले शर्माविरुद्ध जवरजस्ती करणीको जाहेरी परेको र उनी हाल फरार रहेको बताए।

‘एक जना युवतीले जवरजस्ती करणी गरेको जाहेरी दिनुभएको छ,’ उनले भने, ‘जाहेरीपछि अनुसन्धानका लागि खोजी गर्दा उहाँ फेला पर्नुभएको छैन।’ घटना अनुसन्धानका क्रममा रहेकाले प्रहरीले यसबारे थप विवरण उल्लेख गरेको छैन।  

शर्मा निर्माण व्यवसायीसमेत हुन्। उनको ठिमी नगरपालिका-३ गट्ठाघरमा प्रदेश निर्माण सेवा छ।

दोलखाका जिल्लास्तरीय नेता शर्मा बालकोट बस्दै आएका छन्। नेकपा एमालेको गत जिल्ला अधिवेशनमा उनी उपसचिव पदको उम्मेदवार बनेका थिए।

ठेक्कापट्टा साथै शर्मा मिटर ब्याजको कारोबारमा सक्रिय छन्। उनलाई भरतपुरका एक जना निर्माण व्यवसायीलाई मिटरब्याजमा रकम लगाएर पीडित बनाएको आरोप लागेको थियो।