सरकारले सहकारीका ठगलाई बचाउने काम नगरोस, सभामुख तटस्थ बसुनः कांग्रेस

४ जेठ, काठमाडौं । नेपाली कांग्रेसले सभामुख देवराज घिमिरेले संसद बैठक सन्चालन गर्दा तटस्थता नदेखाएको ठहर गरेको छ । आज बसेको कांग्रेस संसदीय दलको बैठकले तटस्थता र निष्पक्षतापूर्वक बैठक संचालन गर्न अनुरोध गर्ने निर्णय पनि गरेको छ ।

कांग्रेसले सहकारी ठगी छानविनमा संसदीय समिति गठन हुनुपर्ने मुद्दा नछोड्ने निर्णय समेत कांग्रेसले गरेको छ । कांग्रेसले सहकारी ठगीमा संलग्नलाई बचाउने काममा नलाग्न सरकारलाई चेतावनी पनि दिएको छ । संसदीय दलको बैठकपछि सञ्चारकर्मीसँग कुरा गर्दै प्रमुख सचेतक रमेश लेखकले सहकारी ठगीमा संलग्नलाई बचाउन सरकार नै उद्यत भए परिणाम राम्रो नहुने चेतावनी दिइएको बताए ।
 
सहकारी ठगीलाई बचाउन सरकार लागेको छ । सरकारलाई चेतावनी दिएका छौँ– यस्तो ठगी बचाउने काम सरकारले नगरोस्, उनले भने । उनले संसदीय समिति गठनको मागमा आफूहरू झनै अडिग रहेको बताउँदै सभामुखले पनि तटस्थता कायम गर्न नसकेको निष्कर्ष निकाल्दै ध्यानाकर्षण गराउने बताए ।

हिजोको संसद् बैठक सञ्चालनलाई लिएर हाम्रो गम्भीर ध्यानाकर्षण भएको छ । संसदीय मूल्य र मान्यतामा विपक्षी दल उभियो भने पनि संसद् अवरोध मानिन्छ । एकजना मात्रै माननीय उभिए पनि अवरोध मानिन्छ है भन्ने मान्यता स्थापित छ । विपक्षीसहित सबै विपक्षमा रहेका दलका सांसदहरू उभिएका बेला संसद् सञ्चालन उचित थिएन । सभामुखको पद तटस्थता र निष्पक्षताको पद हो । सभामुख निर्वाचित भएपछि संलग्नता स्थगित गर्नुपर्छ । सभामुखलाई तटस्थता र निष्पक्षतासहित बैठक सञ्चालन गर्न आह्वान गरेका छौँ, उनले भने ।