संसद भवनमा विपक्षी दल, सिंहदरबारमा सत्ता पक्ष

४ जेठ, काठमाडौं । आज पनि सभामुख देवराज घिमिरेले बोलाएको संसद बैठकको समय गुज्रिएको छ ।  बिहान ११ बजे बैठक बोलाइएको भएपनि कति बेला सुरु हुन्छ भन्ने पत्तो छैन । अहिले संसदको अवरोधका विषयमा सत्तारुढ र विपक्षी दलहरू छुट्टाछुट्टै छलफल गरिरहेका छन् । 

नेपाली कांग्रेस, राष्ट्रिय प्रजातन्त्र पार्टी (राप्रपा), लोकतान्त्रिक समाजवादी पार्टी (लोसपा) लगायतका विपक्षी दलहरू नयाँ बानेश्वरमा छलफल गरिरहेका छन् भने सत्ता पक्षका नेता सिंहदरबारमा छन् । 

बिहीबार प्रतिनिधि सभाको बैठकमा कांग्रेस र एमालेका सांसदहरूबीच धकेलाधकेल नै भएको थियो । त्यसपछि शुक्रबार बिहान ११ बजे बोलाइएको प्रतिनिधि सभाको बैठक सुरु हुन सकेको छैन ।  सभामुख देवराज घिमिरे र राजनीतिक दलका प्रमुख सचेतक र सचेतकहरू पनि छलफलमा जुटेका छन् ।