सिटिजन्स बैंकका सबै कार्डहरू अति सुरक्षित छन्, ढुक्कले चलाउनु भए हुन्छ

पछिल्लो समयमा बैंक तथा वित्तीय संस्थाहरूले विभिन्न किसिम र डिजाइनका क्रेडिट कार्डहरू बजारमा ल्याएका छन् । विश्वव्यापी रुपमै डिजिटल बैंकिङको अवधारणाले परम्परागत बैंकिङ प्रणालीको करिब करिब अन्त नै गरिदिएको छ । आधुनिक प्रविधिको प्रयोगमार्फत बैंकिङ कारोबारमा आम मानिसहरू पनि अभ्यस्त हुँदै जान थालेका छन् र बैंक तथा वित्तीय संस्थाहरूले पनि आफ्ना ग्राहकलाई उच्च प्रविधियुक्त डेबिट र क्रेडिट कार्डको सुविधा दिइरहेका छन् । अत्याधुनिक सुविधासँगै सुरक्षित कारोबारका लागि पनि बैंकहरुको ध्यान केन्द्रीत हुन थालेको छ । 

तर बैंकले दिने विभिन्न कार्डहरूका विषयमा ग्राहकहरूमा अन्योल भइरहेको अवस्था पनि छ । कतिपयले बैंकमा खाता खोल्ने, कार्ड लिने र कुन कार्ड कुन अवस्थामा प्रयोग गर्ने भन्नेसम्म पनि जानकारी नलिएको अवस्था छ । यसै विषयमा आधारित रहेर हामीले सिटिजन्स बैंकका क्रेडिट कार्ड युनिट प्रमुख समीर अधिकारीसँग गरेको कुराकानीका सम्पादित अंश ।  

नेपालको बैंकिङ बजारमा सिटिजन्स इन्टरनेशनल बैंकको छुट्टै स्थान र महत्व छ । यद्यपि यस बैंकले दिने सुविधाका विषयमा धेरै जानकारी नआएको गुनासो ग्राहकहरूमा छ । उनीहरू यो बैंक कस्तो हो भनेर जान्न चाहिरहेका छन, के भन्नुहुन्छ ? 

सिटिजन्स बैंक ग्राहकहरूका लागि सक्षम, इमान्दार र सरल रुपमा सेवा र सुविधा उपलब्ध गराउने बैंकिङ साथी हो । जहाँसम्म हाम्रो बैंकले दिने सेवा सुविधाका बारेमा जानकारी गराउने कुरा छ, यसमा हामी निरन्तर नै लागिरहेकै छौ भने यो बैंकसँग कारोबार गर्न चाहनुहुने कतिपय ग्राहकले यो बैंक कस्तो हो, सेवाहरु कस्ता छन, अरु बैंक भन्दा यसमा के भिन्नता छ भनेर चासो राख्नु स्वभाविक पनि हो । किनभने हाम्रो बारेमा वा यस बैंकको बारेमा हामीले जे जानकारी दिइरहेका हुन्छौं, त्यो सबैमा नपुगेको पनि हुनसक्छ । यसैले यो बैंकबारे जानकारी लिन र कारोबार गर्न खोज्नु हुने ग्राहकहरूलाई म के भन्न चाहन्छु भने सिटिजन्स बैंक भनेको ग्राहकहरूको साथी हो । 

यस बैंकले आफ्ना ग्राहकहरूलाई साथीको जस्तै व्यवहार गर्छ । सबैमा अपनत्व दिन खोजिरहेको छ । यो हाम्रो बैंक हो र यसमा कारोबार गर्दा सुरक्षित भइन्छ भन्ने विश्वास हामीले दिइरहेका छौ र ग्राहकहरूले पनि हाम्रो सेवाबाट त्यो अनुभूति गर्नु भएको छ भन्ने हाम्रो विश्वास छ । हामीले दिएका सेवा सुविधालाई अझै कसरी सरलीकृत गरेर लाने, बैंकमा आएका ग्राहकहरूलाई थप सजिलो गरी सेवा प्रवाह कसरी गर्ने भन्ने कुरामा बैंकको समग्र टीम लागिरहेकै छ । हामी नयाँ ढंगले ग्राहकलाई सेवा उपलब्ध गराउन निरन्तर प्रयासमा छौँ । हामीसँग ढुक्क भएर कारोबार गर्दा हुन्छ ।  

बैंकहरू अहिले पूर्ण रुपले डीजीटल कारोबारमा गइसकेको अवस्था छ । डीजीटल सेवाबारे सिटिजन्स बैंकले अहिले दिइरहेका सेवा र भविष्यमा यसलाई कसरी परिष्कृत गर्दै लैजाने तयारी छ ?  

अहिले पछिल्लो पुस्तालाई हेर्ने हो भने बैंक तथा वित्तीय क्षेत्र विस्तारै प्रविधियुक्त (डीजीटलाइजेशन) हुँदै गइरहेका छन् । यस सन्दर्भमा सिटिजन्स बैंकले पनि डीजीटल कारोबार र डीजीटल सेवाहरुलाई पहिलो प्राथमिकता दिएर अगाडि जाने काम गरिरहेको छ । विशेष गरी ग्राहकहरूको आवश्यकतालाई ध्यानमा राखेर प्रविधियुक्त सेवामा हामीले जोड दिएका छौ । कतिपय डीजीटल सेवाहरु अहिले दिइरहेका छौ भने नयाँ नयाँ सेवाहरु डिजाइन गरेर ग्राहकहरू माझ पुर्याउने प्रयास पनि जारी नै छ । ग्राहकहरू कसरी बैंकसम्म नआइकन नै हामीबाट धेरै भन्दा धेरै सेवासुविधाहरु लिनसक्छन भन्ने कुरालाई ध्यानमा राखेर हामीले कतिपय सेवाहरु पाइपलाइनमा पनि राखेका छौ । ग्राहक लक्षित नयाँ र सरल सेवा दिने कुरालाई केन्द्रमा राखेर सिटिजन्स बैंकले केही कुराहरू थप्ने योजना बनाइरहेको छ । 

मैले यहाँलाई सिटिजन्स बैंकले दिने विभिन्न डीजीटल औजारहरू (कार्ड) का विषयमा जान्न चाँहे । यो बैंकले कारोबारका लागि कस्ता कस्ता कार्डहरू प्रयोगमा ल्याएको छ ? 

हामीले अहिले बजारमा आएका प्रायः सबै कार्डहरू ग्राहक वर्गहरुलाई दिइरहेका छौ । यसरी दिएका कार्डहरूका विषयमा भन्नुपर्दा नेपाली क्रेडिट कार्ड, डलर क्रेडिट कार्ड, ई कम कार्ड, प्रिपेड कार्ड जस्ता विभिन्न प्रकारका कार्डहरू उपलब्ध गराइरहेका छौ । यो बैंकले दिएका क्रेडिट कार्डहरू नेपाल, भारत र भुटानमा पनि चलाउन सकिन्छ । यस्ता कार्डहरू दिँदा हामीले ग्राहकहरूको मासिक कारोबार र आम्दानीलाई हेरेर दिने गरेका छौं । यसबाट बैंकका ग्राहकहरूले सजिलैसँग कारोबार गर्न सक्नुहुन्छ । आफूलाई आवश्यक परेका सामानहरू खरिद गर्न सक्नुहुन्छ ।

अहिले त ट्याप एण्ड पेमेन्टको प्रयोग पनि भइरहेको छ । उहाँहरूले ट्याप एण्ड पेमेन्ट र अनलाइन पेमेन्ट दुवैबाट नेपाल र भारतमा सजिलैसँग कारोबार चलाइरहनु भएको छ । अर्को अन्तर्राष्ट्रिय कार्ड पनि हामीले प्रयोगमा ल्याएका छौ । जसले डलर देखाउनु भएको छ,  जो डलरमा कारोबार गर्नुहुन्छ । उहाँहरूलाई विभिन्न देशमा उहाँहरूले पाएको भिसा अनुसार त्यहाँ पुगेर हामीले दिएको कार्डबाट डलरमा कारोबार गर्न सक्नुहुन्छ । यसरी धेरै ग्राहकले अन्तर्राष्ट्रिय कार्ड प्रयोग गरेर विदेशमा भएको अवस्थामा पनि सहजै रुपमा सेवा लिइरहनु भएको छ । अनलाइन पेमेन्ट, फिजिकल पेमेन्ट वा क्यास निकालेर पेमेन्ट गर्न पनि यो कार्डबाट सकिन्छ ।  

ग्राहकले बैंकसँग कारोबार गर्दा जुन प्रकारका कार्डहरू लिएका हुन्छन् । ति कति सुरक्षित छन, तपाईँको बैंकमा कारोबारका लागि आएका ग्राहक कसरी ढुक्क हुने ? 

पक्कै पनि यो निकै संवेदनशील विषय पनि हो । क्रेडिट कार्ड भन्ने बित्तिकै आफैंमा यो अति संवेदनशील वस्तु पनि हो । यस्ता कार्डहरूको प्रयोग गर्दा वा ग्राहकहरूलाई दिँदा बैंकले यसको सुरक्षाको संवेदनशीलतालाई जहिले पनि पहिलो प्राथमिकता दिएको हुन्छ । हाम्रो सिटिजन्स बैंक पनि यो विषयमा निकै सचेत छ । यसैले हामीले ग्राहकलाई दिएका कार्डहरूलाई सुरक्षित राख्न हामी प्रतिबद्ध पनि छौ । सुरक्षाको आधिकारिता दिन हामीले दर्ता भएको ग्राहकको मोबाइल नम्बरमा ओपीटी (OTP) पठाएर जानकारी दिने र लिने गर्छौ । अहिले त चिप वेस्ट (Chip – Based) कार्ड पनि आएको छ । हामीले चिप वेस्ट Chip– Based) कार्ड मात्र प्रयोग गछौं ।

चिप वेस्ट(Chip– Based) कार्ड यो सुरक्षित पनि छ । ग्राहकहरूको कार्डमा कुनै कारणबस समस्या आयो वा हरायो भने त्यसका लागि हामीले सर्पोट सेन्टर भनेर कल सेन्टर पनि राखेका छौ । यो चौबीसै घण्टा खुल्ला रहन्छ । उहाँहरूले जुनसुकै बेला समस्या आएपनि हामीलाई जानकारी गराउन सक्नुहुन्छ र त्यो समस्या समाधानतिर हामी लाग्छौ । अर्को के कुरा म के विश्वास दिलाउन चाहन्छु भने हाम्रो सिटिजन्स बैंकले दिएका सबै कार्डहरू अति सुरक्षित छन । ग्राहकहरूले ढुक्कले चलाउनु भए हुन्छ ।  सुरक्षाका हिसाबले एकदमै सुरक्षित मेकानिजमको प्रयोग गरेर हामीले कार्डहरू तयार पारेका छौ ।      

​​​​सिटिजन्स बैंकले केही समय अघि किस्ताबन्दी कारोबारका लागि भनेर इन्स्टा–बाई योजना ल्याएको थियो, यो कस्तो हो ?

यो एउटा किस्ता योजना हो । सिटिजन्स बैंकले जस जसलाई क्रेडिट कार्ड दिएको छ र जो जो हाम्रो बैंकबाट क्रेडिट कार्ड लिने सोचमा हुनुहुन्छ । क्रेडिट कार्ड लिएर त्यसले दिने सुविधा अनुसार बैंकबाट कर्जा लिनु भएको छ र त्यो समयमै फिर्ता गर्न मुस्किल भइरहेको छ भने त्यो अवस्थामा ग्राहकले यो किस्ता योजनाको सुविधा लिन सक्नुहुन्छ । किनभने कार्ड प्रयोग गरेर लिएको कर्जा एकैपटक तिर्न कतिपयलाई गाह्रो भइरहेको हुन्छ । हामीले तोकेको सीमाभित्र रहेर कार्डबाट लिएको कर्जा तिर्न सहजता प्रदान गर्ने उद्देश्यले यो किस्ता योजना ल्याइएको हो । जुन किस्ता योजनाबाट कारोबार गर्न सहज पनि छ । हामीले यसमा यति रकम यति समयसम्मका लागि लिन सकिन्छ भनेर सीमा तोकेका छौ । अझ प्रष्ट रुपमा भन्नु पर्दा हामीले जति रकमको कारोबार गर्न सकिने गरी क्रेडिट कार्डको प्रयोग गरेर ग्राहकले लिएको कर्जा तिर्न सजिलो किस्ता योजना हो । 

यो सिटिजन्स बैंकको एउटा राम्रो पक्ष के छ भने For Example कसैलाई हामीले फिक्स लिमिटको एक लाख सीमाभित्र कारोबार गर्न सकिने क्रेडिट कार्ड दिएका छौ र ग्राहकले इएमआइबाट (EMI) केही किन्दै हुनुहुन्छ भने त्यसमा 1=5 टाइम्स बढी तिरेर सामान किन्न सक्नुहुन्छ । अर्थात् एउटा ग्राहकले १ लाख सीमा तोकिएको क्रेडिट कार्डको प्रयोग गरे किन्न लागेको वस्तुमा १ लाख ५० हजारसम्म तिर्न सक्नुहुन्छ । यसमा हामीले अति नै न्यून चार्ज लिन्छौ । कसैले हाम्रो क्रेडिट कार्डबाट टीभी, मोबाइल फोन वा अरु कुनै वस्तु खरिद गर्न सक्नुहुन्छ । हाम्रो क्रेडिट कार्ड प्रयोग गरेर आवश्यक सामान किन्ने र पछि थोरै थोरै गरेर बैंकलाई तिर्न सक्नुहुन्छ । त्यो हिसाबले ग्राहकलाई सजिलो बनाएर इएमआइमा (EMI)कन्भर्ट गराउने सुविधा हामीले दिएका हौँ ।  

 यो किस्ता योजना जस्तै बैंकले पेडी लोनको पनि सुविधा दिएको छ भनिन्छ । यो कस्तो हो, कसरी  लिने ग्राहकले यसबाट लोन ?  

हो, अहिलेकै अवस्थामा हेर्नुहुन्छ भने हामीले डीजीटल माध्यम बाटै २ लाखसम्मको पेडी लोनको व्यवस्था गरेका छौ । यसमा डीजीटल माध्यमबाट लोन माग गर्ने सक्ने र डीजीटल माध्यम बाटै प्राप्त गर्न सकिने अवस्था हुन्छ । अहिले कतिपय ग्राहकहरूले पेडी लोन अन्तर्गत २ लाखसम्म रकम चलाइरहनु भएको पनि छ । उहाँहरूबाट हामीले रेस्पोन्स पनि राम्रै पाएका छौ । जो ग्राहकहरूले यो बैंकमा बचत खाता खोल्नु भएको छ । जसले निरन्तर कारोबार गरिरहनु भएको छ । उहाँहरूलाई अप्ठ्यारो परेको समयमा सजिलो होस भनेर हामीले पेडी लोनको व्यवस्था गरेका हौँ । मोबाइल बैंकिङबाटै ग्राहकहरूले यो लोन लिन सक्नुहुन्छ भने सोही माध्यमबाट चुक्ता गर्न पनि सक्नुहुन्छ ।

यसको अवधि भने एक महिनाको छ । एक महिनासम्म आफ्नो समस्या टारेर ग्राहकहरूले बैंकलाई फिर्ता गर्न सक्नुहुन्छ । यसमा कुनै किसिमको धितो राख्नु पर्दैन । हामी ग्राहकको कारोबारको प्रवृत्तिलाई हेरेर दिन्छौ । फोन लोनसँग सम्बन्धित एउटा कम्पनीसँगको सहकार्यमा बैंकले यो २ लाखसम्मको पेडी लोनको व्यवस्था गरेको हो । यसको माग पनि बढिरहेको छ र ग्राहक पनि सन्तुष्ट हुनुहुन्छ । यस्ता अरु पनि सेवाहरु भोलिका दिनमा जारी गर्ने तयारी हामीले गरिरहेका छौ । डीजीटल माध्यमबाट थप सेवा विकास गर्ने कुरा भइरहन्छ । भोलिका दिनमा के के कुरालाई डीजीटलाइज गर्ने भन्ने कुरामा सिटिजन्स बैंक प्रस्ट छ । विभिन्न नयाँ कार्ड डिजाइन गर्ने कुरा हुन्छ कि अथवा खाता खोल्ने कुरामा यो भन्दा सहज प्रविधि अपनाउन सकिन्छ कि भन्ने कुरामा हामी लागिरहेकै छाैं र लाग्छौँ । 

बैंकले दिने क्रेडिट कार्डबारे धेरैले चासो राखेको देखिन्छ । यस सिटिजन्स बैंकले दिएको क्रेडिट कार्डबाट कति रकमसम्म कारोबार गर्न सकिन्छ ?  

हामीले दिने क्रेडिट कार्ड न्यूनतम् २५ हजारदेखि २ लाख ५ हजारसम्मको छ । किस्तामा पनि २५ हजारदेखि २ लाख ५० हजारसम्मकै सुविधा दिएका छौ । किस्तामा कन्भर्ट गर्दा पनि सजिलो छ । तीन महिना, ६ महिना, ९ महिना र १२ महिनादेखि १८ महिनासम्मकाे समय दिएका छौ । यो समयभित्र बैंकलाई तिर्न सक्ने सुविधा दिएका छौ । यसमा पनि न्यूनतम् चार्ज लिन्छौ । 
                
सिटिजन्स बैंकको क्यास ब्याक योजनालाई ग्राहकले कसरी बुझ्ने, यसमा डेबिट वा क्रेडिटमध्ये कुन  कार्ड प्रयोग महत्वपूर्ण हुन्छ, के फरक छ ? 

दुबै कार्डमा फरक छ । तर, यसमा कतिपय हाम्रा ग्राहकहरू दुविधामा परेको पनि देखिन्छ । हेर्दा दुबै कार्ड उस्तै देखिन्छ । यसमा के फरक  छ भन्ने पनि लाग्छ । किनभने सबैलाई बैंकका नियमबारे जानकारी नहुन पनि सक्छ । त्यसै हामीले ग्राहकहरूलाई अगाडि नै राम्रोसँग बुझाएर दिने गरेका पनि छौँ । डेबिट र क्रेडिट कार्डमा फरक पनि हुन्छ  । डेबिट कार्ड भनेको ग्राहकको खातामा जति रकम छ भने त्यसलाई नै प्रयोग गर्न प्रयोग गरिने कार्ड हो । यो कार्ड एटीएम कार्डहरूमा पनि चल्छ, स्वाब (Swap) गरेर सामान किन्न पनि सकिन्छ र अनलाइन पेमेन्ट गर्न पनि सकिन्छ । तर, क्रेडिट कार्ड भनेको ग्राहकको खातामा पैसा नभएपनि चलाउन सकिने कार्ड हो । खातामा पैसा नभएको अवस्थामा ग्राहकको कारोबारलाई हेरेर सजिलोका लागि बैंकले एउटा सीमा राखेर कर्जा चलाउन दिने व्यवस्था गरेको हुन्छ । त्यो पैसा तोकिएको समय भित्र फिर्ता गर्नुपर्छ, तिर्नुपर्छ ।  

हामीले चाहि ४५ दिनको समय तोकेका छौ । ४५ दिनसम्म यो कार्ड प्रयोग गरेर ग्राहकले लिएको कर्जामा हामीले कुनै चार्ज लिने गरेका छैनौँ । तर, ४५ दिन पछि भने चार्ज लाग्छ । त्यसमा पनि ग्राहकले १० प्रतिशत, ५० प्रतिशत वा पुरै पनि तिर्न सक्ने सुविधा दिएका छौ  । अहिले हामीले हाम्रो क्रेडिट कार्डलाई पनि मोबाइल बैंकिङ एपमा पनि लिंक गराएका छौ । त्यसैले क्रेडिट कार्डको लोन तिर्न बैंकसम्म पनि आइरहनु पर्दैन । सिधै मोबाइल बैंकिङबाट क्रेडिट कार्डको बाँकी पैसा तिर्न मिल्छ ।         

पछिल्लो समयमा प्रिपेड कार्डका विषयमा केही चर्चा भएको पाइन्छ, यो कस्तो विधि हो । सिटिजन्स बैंकले प्रयोगमा ल्याएको छ कि छैन ? 

सिटिजन्स बैंकले पनि प्रिपेड कार्डलाई प्रयागमा ल्याइरहेकै छ । अहिले हामीले हाम्रा ग्राहकलाई देशभन्दा बाहिर चलाउन सजिलो होस भनेर ग्राहककाे बाहिर देशमा जाने टिकट र पासपोर्ट पक्का भइसकेपछि नेपाल राष्ट्र बैंकले तोकेको सीमाभित्र रहेर २५ सय डलरसम्म दिने गरेका छौ । हाम्रो बैंकमा यो प्रिपेड कार्ड लिन एकदमै सजिलो पनि छ । कुनै झन्झट छैन । जसले खाता खोल्नु भएको छ, उहाँले बैंकमा आएर माग गरेको खण्डमा आधा घण्टाभित्र पाउनु हुन्छ । जसलाई ग्राहकले विदेशमा गएर पनि यसको ढुक्कसाथ प्रयोग गर्न सक्नुहुन्छ ।   

 डेबिट र क्रेडिट कार्ड प्रयोग गरिरहेका सिटिजन्स बैंकका ग्राहकहरूलाई तपाँईकाे सुझाव के छ ?  

हाम्रो तर्फबाट ग्राहकहरूलाई जहिले पनि कार्डहरूको प्रयोग गर्दा सुरक्षित तरिकाले प्रयोग गर्नुस् भन्ने नै हो । आफूले लिएको कार्डलाई सुरक्षित रुपमा राख्नुपर्छ । कुनै पनि किसिमले ड्यामेज आउने गरी राख्न हुँदैन । कार्डमा कुनै समस्या आयो भने बैंकलाई तुरुन्त खबर गर्नुपर्छ । हामीले चौविसै घण्टा सुझाव लिने व्यवस्था पनि गरेका छौ ।  यो सेवा अहिले देशभर १ सय ९० वटा शाखाबाट दिने काम भइरहेको छ । यसै पनि हामीले बैंकले दिने कुनै पनि सेवा सुविधामा कमी आउन दिएका छैनौं । हामीले जहिले पनि ग्राहकहरूको आवश्यकता अनुसार र माग अनुसारका सेवाहरु डिजाइन गर्दै बजारमा लगिरहेका छौ । हामीले बजारमा निकालेका सेवा सुविधाहरु विश्वासिला र भरपर्दा छन । यसमा कुनै पनि ग्राहकहरूबाट गुनासो आउने गरी काम गरेका छैनौँ । सिटिजन्स बैंक आफ्ना ग्राहकप्रति लक्षित छ, ग्राहकहरूको चाहना अनुसार विश्वास योग्य सेवाहरु बजारमा ल्याएको छ र यसमा कारोबार गर्दा सुरक्षित भइन्छ भन्ने विश्वास ग्राहकहरूमा पनि छ । यसमा बैंक विश्वस्त छ ।  

यस बैंकले आफ्ना ग्राहकहरूका लागि केही नयाँ योजना वा अरु कुनै विषयमा जानकारी दिनुपर्ने छ ?  

सिटिजन्स बैंक जहिले पनि नयाँ सेवाहरु उत्पादन गर्न र ग्राहकसम्म पुर्याउन प्रयासरत नै छ । आफ्ना ग्राहकहरूलाई कसरी नयाँ प्रविधियुक्त सेवाहरु दिने भन्ने कुरामा बैंक लागिरहेकै हुन्छ । हामी चाँडै ग्राहक वर्गहरुमा नयाँ सर्भिस प्रोभाइड गर्ने तयारीमा छाैं । यस हिसाबले चाँडै अहिले दिइरहेका फिजिकल क्रेडिट कार्डहरू जस्तै भर्चुअल कार्डको व्यवस्था गर्न गइरहेका छौँ । त्यो भनेको अब ग्राहकहरूले एउटा क्रेडिट कार्ड मोबाइल बैंकिङबाट चलाउन मिल्ने गरी डिजाइन गरेर त्यसको प्रयोग पनि गरिसकेका छौ । अब चाँडै नै ग्राहक वर्गहरुमा नयाँ खालको क्रेडिट कार्ड मोबाइल बैंकिङबाट प्रयोग गर्न सकिने कन्सेप्ट लिएर आउँदैछौँ । यसको साथसाथै जहिले पनि हाम्रो प्राथमिकता भनेको बजारमा भएका भन्दा फरक खालको सेवा  र सुविधा दिने कुरामा हामी प्रतिबद्ध छौँ, सिटिजन्स बैंक प्रतिबद्ध छ ।