बालुवाटार छलफलबाट समिति गठन हुने आश्वासन लिएर फर्कियो कांग्रेस

५ जेठ, काठमाडौं । प्रधानमन्त्री पुष्पकमल दाहाल प्रचण्ड र नेपाली कांग्रेसका नेताहरूबीच छलफल भएको छ । शनिबार बिहान कांग्रेस नेताहरूलाई बालुवाटार बोलाएर प्रधानमन्त्री प्रचण्डले संसदको अवरोध खुलाउनेबारे छलफल गरेका हुन् । छलफलमा सहकारी ठगीका विषयमा छानबिन समिति गठन गर्ने कुरा अन्तिम चरणमा पुगेको प्रधानमन्त्रीले जानकारी दिएका छन् ।  

कांग्रेस नेतासँगको छलफल पछि सत्ता पक्षका नेताहरूसँग प्रधानमन्त्रीको छलफल रहेको छ । सत्ता पक्षका नेतासँगको छलफलपछि समिति बनाउने कुरा अन्तिम चरणमा पुग्ने प्रधानमन्त्री प्रचण्डले कांग्रेसका नेताहरूलाई आश्वासन दिएका छन् । आज साँझसम्ममा केही नतिजा आउने प्रधानमन्त्रीको भनाइ छ । 

छलफलमा नेपाली कांग्रेसका सभापति शेरबहादुर देउवा, उपसभापति पूर्णबहादुर खड्का, महामन्त्री गगन थापा र प्रमुख सचेतक रमेश लेखक सहभागी थिए । छलफलमा सहकारी ठगीको विषयमा संसदीय छानबिन समिति बनाएर वर्तमान राजनीतिक गतिरोधलाई निकास दिन दुबै पक्ष सकारात्मक भएका छन् ।  

प्रधानमन्त्रीसँग छलफलपछि कांग्रेस नेता रमेश लेखकले प्रधानमन्त्री छानबिन समिति बनाउनका लागि सकारात्मक भएको बताए । राजनीतिक गतिरोध चाँडै अन्त्य होस् भन्ने उहाँको पनि चाहना रहेको छ । तर सत्ता समीकरणमा कुरा मिलेको छैन, उनले बताए ।
 
कांग्रेसले उपप्रधानमन्त्री एवं गृहमन्त्री रवि लामिछानेमाथि सहकारी ठगी प्रकरणमा संसदीय छानबिन समिति गठन गर्नुपर्ने माग गर्दै संसद्मा अवरोध गर्दै आएको छ । कांग्रेसकै अवरोधका कारण बिहीबारको बैठक कार्यसूचीमा प्रवेश गर्न सकेन भने शुक्रबारका लागि बोलाइएको बैठक बस्दै नबसी स्थगित भएको थियो ।