वैदेशिक रोजगारीमा भएको ठगीलाई सरकारले हेर्नुपर्छः देउवा

५ जेठ, काठमाडौं । नेपाली कांग्रेसका सभापति शेरबहादुर देउवाले वैदेशिक रोजगारीमा भएको ठगीलाई सरकारले हर्न नसकेको बताएका छन् । ठगिएका नेपालीको समस्या समाधानमा लाग्न उनले सरकारसँग आग्रह गरेका छन् । शनिबार काठमाडौंमा आयोजित नेपाल लोकतान्त्रिक वैदेशिक रोजगार व्यवसायी एसोसिएसनको १२ औं साधारणसभालाई सम्बोधन गर्दै उनले नेपालमा वैदेशिक रोजगारीका थुप्रै समस्या रहेको बताए । 

नेपालमा वैदेशिक रोजगार महत्वपूर्ण कुरा हो । एकातिर विदेशमा रोजगार गर्न नेपालीले पाउँछन् । तर त्यहाँ ठगिएका कुराहरू, दुःख पाएको मैले थाहा पाएँ, यस्ता कुरा रोक्न हामी लाग्नुपर्छ, उनले भने, रेमिट्यान्सको पैसा आउँछ, त्यसले नेपाललाई रेमिट्यान्स मात्रै होइन अरु पनि धेरै फाइदा हुन्छ । त्यसैले रोजगारीमा गएका साथीहरू ठगिनु भएन । दुःख पाउनु भएन । कति जेलमा थुनिएका छन्, धेरै दुःख पाएका छन् । 

विदेशमा रोजगार गर्न जाने र त्यहाँ श्रमिकले पाइरहेको दुःखका बारेमा आफू जानकार रहेको भन्दै उनले श्रमिकमाथि भइरहेको शोषणको समस्या रोक्न आग्रह गरे । उनले वैदेशिक रोजगारीमा गएका नेपालीबाट देशमा आउने रेमिट्यान्ससँगै श्रमिकको समस्या समाधानमा आवश्यक भूमिका खेल्नुपर्ने बताए । सभापति देउवाले नेपाल लोकतान्त्रिक वैदेशिक रोजगार व्यवसायी एसोसिएसनलाई दुःख पाएका नेपालीको समस्या समाधान गर्ने काममा लाग्नुपर्ने बताए ।