सहकारी ठगी प्रकरणको छानबिन समितिको 'टिओआर' बनाउन कार्यदलको बैठक बस्दै

६ जेठ, काठमाडौं । सहकारी ठगी प्रकरणको छानबिन गर्ने संसदीय समितिको कार्यादेश (टिओआर) बनाउन कार्यदलको बैठक बस्दैछ । बैठक बिहान साढे ८ बजे बस्न लागेको हो । कानुन, न्याय तथा संसदीय मामिला मन्त्री पदम गिरीको संयोजकत्वमा गठन भएको कार्यदलमा एमालेका महेश बर्ताैला, कांग्रेसका जीवन परियार र रास्वपाका शिशिर खनाल रहेका छन् । 

सत्ता गठबन्धन र नेपाली कांग्रेसका शीर्ष नेताहरु सहकारी ठगी प्रकरणको छानबिन गर्न संसदीय समिति बनाउन सहमत भएका थिए । उक्त समितिको कार्यादेश (टिओआर) बनाउन कार्यदलको बैठक बस्न लागेको हो ।   

छानबिन समिति गठन गर्ने विषयमा शनिबार चरणवद्धरुपमा छलफल भएको थियो । सुरुमा प्रधानमन्त्री पुष्पकमल दाहाल ‘प्रचण्ड’ ले सभामुख देवराज घिमिरे, नेपाल कम्युनिष्ट पार्टी (एमाले) का अध्यक्ष केपी शर्मा ओली, उपप्रधानमन्त्री तथा गृहमन्त्री रवि लामिछाने, कानुन मन्त्री पदम गिरी लगायतसँग छलफल गरेको थियो।

सभामुखसँगको छलफलपछि प्रधानमन्त्री दाहालसहित सत्तारुढ दलका नेताहरूले प्रमुख प्रतिपक्षी दल नेपाली कांग्रेसका सभापति शेरबहादुर देउवा, महामन्त्री गगन थापा, प्रमुख सचेतक लेखक लगायतसँग छलफल गरेका थिए । 
उपप्रधानमन्त्री तथा गृहमन्त्री रवि लामिछाने सहकारीको रकम हिनामिनामा मुछिएको विषयमा संसदीय छानबिन समिति गठन गरिनुपर्ने मागसहित कांग्रेसले संसदमा अवरोध गर्दै आएको थियो ।