टीओआरबारे कार्यदलमा विवाद, सहमति नभएसम्म संसद बैठक रोक्न प्रतिपक्षको आग्रह

६ जेठ, काठमाडौं । संसदीय छानबिन समितिको  कार्यक्षेत्रमा टुंगो लगाउन गठित कार्यदलको बैठकमा कार्यक्षेत्रमा विवाद देखिएको छ । उपप्रधान तथा गृहमन्त्री रवि लामिछाने मुछिएको सहरकारी ठगी प्रकरणमा संसदीय छानबिन समिति गठन गर्ने सहमति जुटाएका दलहरु कार्यक्षेत्रको विवादमा अल्झिएको हो । 

सिंहदरबारमा आइतबार जारी बैठकमा दलहरूले समितिको कार्यक्षेत्रका विषयमा सहमति जुटाउन नसक्दा प्रतिनिधि सभाको बैठक रोक्न विपक्षीले आग्रह गरेको हो । विपक्षी मोर्चाले संसदीय समितिको टिओआरमा सहमति नजुटेसम्म प्रतिनिधिसभा बैठक सञ्चालन नगर्न आग्रह गरेको कांग्रेसले जनाएको छ । 

टिओआरमा सहमति जुटाउन कार्यदलको बैठक सिंहदरबारस्थित कानुन मन्त्रालयमा बसिरहेको छ । विपक्षी मोर्चाको बैठक सकेर कांग्रेस नेता रमेश लेखक पनि कार्यदलको बैठकमा पुगेका छन् । यसअघि ज्ञानेन्द्र कार्की पनि कार्यदल बैठकमा थपिएका थिए ।