कार्यदलको बैठक छाडेर संसदीय दलको कार्यालयमा आए कार्की र परियार

६ जेठ, काठमाडौं । नेपाली कांग्रेसले पार्टीको तर्फबाट कार्यदल सदस्यमा खटाएका जीवन परियारलाई संसदीय दलको कार्यालयमा बोलाएको छ । गठन हुन लागेको संसदीय समितिको कार्यादेशबारे कार्यदलमा छलफल भइरहेका बेला कांग्रेसले कार्यदलमा रहेका सदस्यहरूलाई संसदीय दलको कार्यालयमा बोलाएको हो ।  
कानुन मन्त्री पदम गिरी नेतृत्वको कार्यदलमा नेपाली कांग्रेसका तर्फबाट जीवन परियार सदस्य छन् । विहानदेखि उक्त बैठकमा ज्ञानेन्द्र कार्की पनि सहभागी भइरहेका छन्  । उनीहरू दुवैलाई प्रमुख सचेतक रमेश लेखकले दलको कार्यालयमा बोलाएका हुन् ।

कार्यादेशमा गृहमन्त्री रवि लामिछानेको नाम राख्ने वा नराख्ने भन्नेमा कार्यदल स्तरमा सहमति जुट्न सकेको छैन । कार्यदलमा सहमति जुट्न नसक्दा संसद् बैठक समेत प्रभावित भएका छन् । कार्यदल स्तरमा टिओआरबारे सहमति जुटेपछि मात्रै संसद् बैठक सञ्चालन गर्नुपर्ने विपक्षीको माग अनुसार बैठक २ बजेसम्म सारिएको थियो ।

उनीहरूसँग महामन्त्री गगन थापा, प्रमुख सचेतक लेखक रमेश लेखक लगायतले छलफल गर्दैछन् । नेताहरूका अनुसार कार्यदलको बैठक २० मिनेटका लागि स्थगित भएको छ । नेताहरूका अनुसार उपप्रधान तथा गृहमन्त्रीको नाम नलेख्ने तर समस्याग्रस्त सहकारीको नाम लेख्ने गरी सहमतिको प्रयास भएको छ । यसमै दलहरू सहमति नजिक पुगेका हुन् ।