कार्यदलको बैठक बस्न नसक्दा संसदीय छानबिन समिति गठन प्रक्रिया अन्योलमा

७ जेठ, काठमाडौं । सहकारी ठगी प्रकरणको छानबिनका लागि गठन गर्ने भनिएको संसदीय समितिको कार्य क्षेत्रगत सर्त (टीओआर) टुंगो लगाउने आज बिहान बस्ने भनिएको कार्यदलको बैठक अनिश्चित भएको छ । गृहमन्त्री रवि लामिछानेको सम्बोधन लगत्तै बस्ने भनिएको बैठक थप अनिश्चित बनेको हो ।

आजै प्रधानमन्त्री पुष्पकमल दाहाल प्रचण्डले विश्वासको मत लिने तयारी भएको हुनाले त्यसअघि आफ्नो रणनीति तय गर्न दलहरू लागेका छन् । कार्यदल संयोजक एवं कानुन, न्याय तथा संसदीय मामिला मन्त्री पदम गिरीले अब प्रधानमन्त्रीले विश्वासको मत लिएपछि मात्र बैठक बस्ने तयारी गरिएको जानकारी दिए ।

संसदीय छानबिन समितिको कार्यादेशको विषयमा सत्तापक्ष र प्रतिपक्षबीच कुरा मिल्न सकेको छैन । उपप्रधानमन्त्री तथा गृहमन्त्री रवि लामिछाने र उनी जोडिएको सहकारीको नाम कार्यादेश (टीओआर) मा राख्ने कि नराख्ने विवादले संसदीय छानबिन समिति गठन अनिश्चित बनेको छ ।

सहकारीको बचत रकम अपचलन बारे छानबिन गर्न बन्ने संसदीय समितिको कार्यादेश बनाउने जिम्मेवारी पाएको कार्यदलको बैठकमा नेताहरूबीच आइतबार पटक–पटक गरी सात घण्टा भन्दा बढी छलफल भएको थियो । टीओआर बनाउन कानुन मन्त्री पदम गिरी नेतृत्वमा कार्यदल बनेको थियो । कांग्रेस सहमहामन्त्री जीवन परियार, एमालेबाट प्रमुख सचेतक महेश बर्तौला, राष्ट्रिय स्वतन्त्र पार्टीबाट शिशिर खनाल सदस्य रहेको कार्यदल शनिबार गठन भएको थियो ।