प्रधानमन्त्रीलाई विश्वासको मत लिन नदिने कांग्रेसको निर्णय, गृहमन्त्री अराजक भएको ठहर

७ जेठ, काठमाडौं । नेपाली कांग्रेसले प्रधानमन्त्री पुष्पकमल दाहाल प्रचण्डले विश्वासको मत लिने प्रयोजनका लागि बोलाइएको संसदको बैठक अवरुद्ध गर्ने निर्णय गरेको छ । हिजोको संसद बैठकमा गृहमन्त्री रवि लामिछाने हिंस्रक रुपमा प्रस्तुत भएको भन्दै कांग्रेसले त्यसप्रति प्रधानमन्त्रीको ध्यानाकर्षण गराउने निर्णय पनि गरेको छ ।

प्रधानमन्त्री प्रचण्डले आजको संसद बैठकमा विश्वासको मत लिने भएपछि बिहान कांग्रेस संसदीय दलको बैठक बसेको थियो । सो बैठकपछि कांग्रेस प्रमुख सचेतक रमेश लेखकले हिजोको संसद बैठकमा सम्बोधन गर्ने क्रममा गृहमन्त्री लामिछाने असभ्य, कपोलकल्पित र हिंस्रक ढंगले प्रस्तुत भएको बताए । त्यसबारे प्रधानमन्त्रीको ध्यानाकर्षण गराउने उनले जानकारी दिए ।

कांग्रेसले लामिछाने सहकारीको बचत अपचलनमा संलग्न रहेको भन्दै संसदीय छानबिन समिति बनाउनुपर्ने ‘बटमलाइन’ कायमै राखेको छ । बचत हिनामिना, ठगी भएको छ । ठगी गर्ने काममा माननीय गृहमन्त्री रवि लामिछाने संलग्न रहेको प्रस्ट भएको छ, बैठकपछि कांग्रेसका प्रमुख सचेतक रमेश लेखकले भने, आजको बैठकले सहकारीको ठगीको छानबिनमा संलग्न रवि लामिछाने र सम्बन्धितलाई कडा कारबाही गर्न संसदीय छानबिन समिति गठनको पूर्ववर्ती निर्णयमा दृढ छौँ ।
 
उनले आइतबारको प्रतिनिधिसभामा बैठकमा गृहमन्त्री असभ्य रूपमा प्रस्तुत भएको बैठकबाट निष्कर्ष निकालिएको जानकारी दिए । लेखकले गृहमन्त्रीले प्रश्न सोध्ने नभएर आफूमाथिका प्रश्नको जवाफ दिनुपर्ने बताए । आफूमाथि लागेको आरोपबाट भाग्ने प्रयास गर्नुभयो । असभ्य र हिंस्रक ढंगले प्रस्तुत गर्नुभएको छ, लेखकले भने ।