कांग्रेससहित विपक्षी दलहरुले गरे संसद अवरोध, १५ मिनेटका लागि बैठक स्थगित

७ जेठ, काठमाडौं । नेपाली कांग्रेससहितका विपक्षी दलहरूले अवरोध गरेपछि प्रतिनिधि सभा बैठक १५ मिनेटका लागि स्थगित भएको छ । उनीहरुले उपप्रधान तथा गृहमन्त्री रवि लामिछाने जोडिएको सहकारी ठगी प्रकरणमा छानबिन गर्न माग राख्दै आएका छन् ।

बैठक सुरु हुना साथ विपक्षी सांसदले वेल घेराउ गरेका थिए । प्रधानमन्त्री पुष्पकमल दाहाल प्रचण्डले विश्वासको मत लिने प्रयोजनका लागि बोलाइएको बैठकमा कांग्रेसका सांसदहरूले नाराबाजी गरे । 

कांग्रेस सांसदहरूले वेल घेराउ गर्दै नाराबाजी गरिरहे । उनीहरुले आफूहरूले दलको तर्फबाट बोल्न पाउनुपर्ने बताएका थिए । तर सभामुखले नियमित कार्यसूचीमा लैजान खोजेपछि कांग्रेस सांसदहरू वेलमा आएर नाराबाजी गरेका हुन् । त्यसपछि सभामुख घिमिरेले १५ मिनेटका लागि भन्दै बैठक स्थगित भएको घोषणा गरे ।