प्रतिपक्षी दलहरुको निष्कर्ष, सभामुख मर्यादाहीन भए

७ जेठ, काठमाडौं । प्रतिपक्षी दलहरूले प्रतिनिधिसभाका सभामुख देवराज घिमिरे मर्यादाहीन भएको आरोप लगाएका छन् । संसद बैठकपछि विपक्षी दलहरुले घिमिरे सभामुखको स्थापनमा बस्न योग्य नभएको निष्कर्ष निकालेका छन् । सहकारीको रकम अपचलन प्रकरणमा गृहमन्त्री रवि लामिछानेमाथि छानबिन गर्न संसदीय समिति बनाउनुपर्ने माग सडकमा लैजाने उनीहरुले बताएका छन् ।  

सोमबार अवरोधका बीच प्रधानमन्त्री पुष्पकमल दाहाल प्रचण्डले विश्वासको मत लिएपछि बसेको प्रतिपक्षी दलको बैठकले सो निर्णय गरेको हो । बैठकले सभामुख देवराज घिमिरेले आफ्नो मर्यादा बिर्सिएको निष्कर्ष समेत निकालेको छ । 

सभामुख सभामुखजस्तो रहनुभएन । अमुक पार्टीको कार्यकर्ता जसरी प्रस्तुत हुनुभयो । हामीले उठाइरहेको विषयमा सदनमा मात्रै होइन । अब सडकका पनि पुर्याउँछौं,” बैठकपछि राष्ट्रिय प्रजातन्त्र पार्टीका प्रमुख सचेतक ज्ञानेन्द्रबहादुर शाहीले भने । संसद्मा सत्ता पक्षमा बहुमतको दम्भ देखिएको विपक्षीदलको ठहर  छ । साथै उनीहरुले सभामुखलाई पदीय मर्यादा कायम राख्दै भूमिका निर्वाह गर्न आग्रह पनि गरेका छन् ।