गृहमन्त्रीले यथाशिघ्र संसदीय छानबिन समिति बनाएर देउवा र थापामाथिका आरोप प्रमाणित गरुनः कांग्रेस

८ जेठ, काठमाडौं । नेपाली कांग्रेस राष्ट्रिय स्वतन्त्र पार्टीका सभापतिसमेत रहेका उपप्रधान तथा गृहमन्त्री रवि लामिछानेलाई कांग्रेस सभापति शेरबहादुर देउवा र महामन्त्री गगन थापाविरुद्ध लगाएका आरोप प्रमाणित गर्न चुनौती दिएको छ । कांग्रेसले उनीहरूमाथि लागेको आरोप प्रमाणित गर्न संसदीय छानबिन समिति बनाउनु परे त्यसको टीओआरमा देउवा र गगनको नाम किटान गरेर बनाउन र दोषी प्रमाणित गर्न चुनौती दिएको हो ।  

मंगलबार प्रतिनिधि सभाको बैठकमा पार्टीको तर्फबाट बोल्दै सांसद बद्रीप्रसाद पाण्डेले गृहमन्त्री लामिछानेले आइतबार आफ्ना पार्टी सभापति र महामन्त्रीमाथि लगाएको आरोप पुष्टि गर्नुपर्ने बताए । सभामुख देवराज घिमिरेसँग समय लिएर पाण्डेले गृहमन्त्री लामिछानेले आफूमाथि उठेका प्रश्नको जवाफ दिनुको सट्टा बर्बराएको टिप्पणी गर्दै कांग्रेस नेतामाथि लगाएको आरोप प्रमाणित गर्न चुनौती दिए । 

पाण्डेले आफ्ना सभापति र महामन्त्रीमाथि लगाएको आरोपको छानबिन गर्न पनि गृहमन्त्रीलाई चुनौती दिँदै भने, ‘हाम्रो पार्टीका सभापति र महामन्त्रीमाथि जसरी उहाँले लाञ्छना लाउनुभएको छ । म चुनौती दिन चाहन्छु– के कस्तो खालको टीओआर बनाउनुपर्ने हो बनाउनुहोस् । हाम्रो उपसभापति र महामन्त्रीको नाम किटेरै टीओआरमा लेख्नुपर्ने हो कि, व्यक्तिको लेख्नुपर्ने हो कि, नेपाली कांग्रेस पार्टीको लेख्नुपर्ने हो लेख्नुस् । संसदीय छानविन समिति बनाएर छानबिनको समय पनि तोक्नुहोस् ।’

छानबिनपछि आउने निष्कर्ष स्वीकार गर्न आफूहरू तयार रहेको उनले बताए । गृहमन्त्रीले लगाएका आरोपहरूमाथि छानबिनका लागि सांसद पाण्डेले सभामुखसमक्ष रुलिङको माग समेत गरेका छन् । गृहमन्त्रीले लगाएका आरोपहरू यदि सत्य हुन् भने प्रमाणित गरेर देखाउनलाई सभामुख ज्यूको रुलिङ चाहियो । नभए संसदको रेकर्डबाट रविले बोलेका कुरा हटाउनुपर्ने उनले माग गरे । 

नेता पाण्डेले भने, ‘‘हाम्रो उपसभापति र महामन्त्री दोषी हुनुभयो भने उपसभापति र महामन्त्री त के कांग्रेसका को कोलाई कारबाही गर्नुपर्छ गर्नुहोस् ।’ गृहमन्त्रीले राष्ट्रको सूचना बेच्ने व्यक्ति संसदमै छन् भनेको भन्दै पाण्डेले त्यो व्यक्ति देखाउन चुनौती दिए । ‘राष्ट्रिय सूचनाहरू बेच्ने एजेन्टहरू यही सदनमा छन् भन्नुभएको छ । गृहमन्त्री ज्यू को हो त्यो एजेन्ट देखाउनुहोस् । उसलाई यो सदनबाट गलहत्याउने तपाईंको साथमा हामी लाग्छौं । तपाईं निराधार आरोप लगाउँदै हुनुहुन्छ भने माननीय गृहमन्त्री ज्यू तपाईंलाई यो सदनबाट गलहत्याउन नपराेस्, त्यो कामबाट पनि हामी चुक्ने छैनौं’, कांग्रेस सांसद पाण्डेले भने ।