प्रेस तथा अभिव्यक्ति स्वतन्त्रता कुण्ठित गर्ने उद्देश्यले सिरोहियालाई पक्राउ गरियो : प्रेस युनियन

८ जेठ, काठमाडौं । नेपाल प्रेस युनियनले कान्तिपुर मिडिया ग्रुपका अध्यक्ष कैलाश सिरोहियालाई पक्राउ गरेको घटनाप्रति गम्भीर ध्यानाकर्षण भएको जनाएको छ ।  सहकारी ठगीका विषयमा कान्तिपुर दैनिकमा निरन्तर खोजमुलक समाचार प्रकाशित भएपछि उपप्रधान तथा गृहमन्त्री रवि लामिछानेको निर्देशनमा प्रहरीले पूर्वाग्रह पूर्ण ढंगले सिरोहियालाई कार्यकक्षाबाटै पक्राउ गरिएको घटनालाई प्रेस युनियनले घोर निन्दा गर्दछ, महासचिव दिलीप पौडेलद्धारा जारी विज्ञप्तिमा भनिएको छ ।  

प्रहरीले नागरिकताको विषय देखाएर पक्राउ गरिएको भनिए पनि गृहमन्त्री लामिछानेले सत्ता र शक्तिको दुरुपयोग गर्दै प्रेस तथा अभिव्यक्ति स्वतन्त्रता कुण्ठित गर्ने उद्देश्यले पक्राउ गरिएको ठहर युनियनले गरेको जनाएको छ । 

गृहमन्त्री लामिछानेले यसअघि बाह्र भाइको नाममा सम्पादकहरू विरुद्ध दिएको अभिव्यक्ति, सम्पादकीय स्वतन्त्रतामा हस्तक्षेप हुने गरी गृह मन्त्रालयले दिएको हुकुमी शैलीको लिखित निर्देशन, सार्वभौम संसदको रोष्टमबाटै मिडिया विरुद्ध बोल्नु र अहिले मिडिया सञ्चालकलाई पूर्वाग्रह पूर्ण ढंगले पक्राउ गर्न निर्देशन दिनुले रास्वपाका सभापतिसमेत रहेका लामिछानेको नियत प्रष्ट हुन्छ, विज्ञप्तिमा उल्लेख छ ।  
सत्ता र शक्तिको दुरुपयोग गरेर मिडियामाथिको आक्रमण रोक्न, प्रेस तथा अभिव्यक्ति स्वतन्त्रता कुण्ठित गर्ने कार्य नगर्न प्रेस युनियनले सबैलाई सचेत गराएको छ ।