उपेन्द्र यादव नेतृत्वको जसपाले जेठ ३० गते केन्द्रीय समिति सदस्यको निर्वाचन गराउने

९ जेठ, काठमाडौं । जनता समाजवादी पार्टी (जसपा) नेपालले पार्टी विभाजन भएपछि नयाँ केन्द्रीय सदस्यहरूको निर्वाचन गराउने भएको छ । पार्टीको केन्द्रीय निर्वाचन तदर्थ समितिले राष्ट्रिय महाधिवेशनबाट निर्वाचित हुने केन्द्रीय समितिको निर्वाचन कार्यतालिका सार्वजनिक गरेको छ । 

कार्यतालिका अनुसार जेठ २८ गते दिनको १ बजे मतदाताको नामावली प्रकाशित, जेठ २९ गते बिहान १० बजेदेखि १२ बजेसम्म उम्मेदवारको मनोनयन दर्ता हुनेछ । सोही दिन १२ बजेदेखि २ बजेसम्म मनोनयपत्र माथि पर्ने दावी विरोध दर्ता गर्ने, जाँचबुझ गर्ने कार्य हुने र त्यसैदिन ४ बजेसम्म सो उपर निर्णय गरिने भएको छ ।

जेठ ३० गते बिहान ८ बजेदेखि साँझ ५ बजेसम्म मतदान कार्य हुनेछ । केन्द्रीय समितिको निर्वाचन सकिएपछि सबै पदको लागि मतगणना एकैपटक हुने जसपा नेपालले जनाएको छ ।