सहकारी पीडितका पक्षमा गरिने सडक आन्दोलन बारे भ्रातृसंस्थाका प्रतिनिधिसँग कांग्रेसको छलफल

९ जेठ, काठमाडौं । सहकारी पीडितका पक्षमा सडक आन्दोलन गर्ने तयारीमा जुटेको नेपाली कांग्रेसले आफ्ना भातृ संस्थाका प्रतिनिधिहरूसँग छलफल गरेको छ । भ्रातृ संगठनका प्रमुखहरूलाई सानेपामा बोलाएर आन्दोलनको रणनीतिबारे छलफल गरेको हो । 

कांग्रेसले नेपाल महिला संघ, नेपाल तरुण दल, नेपाल विद्यार्थी संघका अध्यक्षहरूलाई सानेपामा बोलाएको छ । उनीहरुलाई शुक्रबार काठमाडौंमा हुने आन्दोलनको तयारी गर्न निर्देशन दिइएको छ । सडक संघर्षलाई प्रभावकारी बनाउन भ्रातृ संगठन परिचालन गर्ने कांग्रेसको तयारी छ । 

बुधबार पार्टी मुख्यालय, सानेपामा बसेको केन्द्रीय समिति र संसदीय दलको संयुक्त बैठकले सहकारी ठगीका दोषीलाई कारबाहीका लागि दबाब दिन र पीडितलाई न्याय दिलाउन सडक संघर्षमा जाने निर्णय गरेको थियो । सडक संघर्षको सुरूवात शुक्रबार भृकुटीमण्डपबाट गर्ने कांग्रेसले जनाएको छ ।