सर्वोच्चबाट मुद्दा किनारा नलागेसम्म गण्डकी प्रदेशसभा बैठकमा कांग्रेस सहभागी नहुने

१० जेठ, काठमाडौं । सर्वोच्च अदालतबाट मुद्दाको अन्तिम किनारा नलागेसम्म गण्डकी प्रदेशसभाको बैठकमा नेपाली कांग्रेस सहभागी नहुने भएको छ ।  गण्डकी प्रदेश सभाको बैठक ११ जेठको दिउँसो ३ बजेका लागि बोलाइएको छ । सो बैठक बहिस्कार गर्ने कांग्रेसको निर्णय छ । 

मुख्यमन्त्री खगराज अधिकारीको विश्वासको मत विरुद्ध दायर गरेको रिट सर्वोच्च अदालतमा विचाराधीन रहेको भन्दै कांग्रेसले त्यसको अन्तिम किनारा नलागेसम्म संसद बैठकमा सहभागी नहुने जनाएको हो । प्रमुख सचेतक नन्दप्रसाद न्यौपानेले विज्ञप्ति निकालेर यसबारे जानकारी गराएका छन् ।

मुख्यमन्त्री खगराज अधिकारीले प्रदेशसभामा ३० सांसदको समर्थन पाउँदैमा सभामुख कृष्णप्रसाद धितालले मुख्यमन्त्रीले विश्वासको मत पाएको घोषणा गरेका थिए । जब कि ६० प्रदेशसभा सदस्य रहेको गण्डकीमा विश्वासको मत पाउन ३१ सांसदको समर्थन आवश्यक पर्छ ।

कांग्रेसले मुख्यमन्त्री अधिकारीले लिएको विश्वासको मत असंवैधानिक रहेको भन्दै १४ जेठमा कांग्रेस संसदीय दलका नेता सुरेन्द्रराज पाण्डेले सर्वोच्चमा रिट दायर गरेका थिए । मुद्दाको अन्तिम किनारा नलाग्दासम्म प्रदेश सभा बैठक र सरकारले गर्ने कुनै पनि कार्यमा नेपाली कांग्रेसको सहभागिता नरहने कांग्रेस संसदीय दलका प्रमुख सचेतक न्यौपानेले बताए ।