सुत्केरीले पाउने यातायात खर्च पनि प्रतिष्ठानद्वारा कटौती

१० जेठ, तुलसीपुर दाङ । राप्ती स्वास्थ्य विज्ञान प्रतिष्ठान दाङले सरकारको आमा सुरक्षा कार्यक्रम लागु गरे पनि सुत्केरी महिलाले यातायात खर्चवापत पाउने रकम कटौती गरेको छ । प्रतिष्ठानले जेठ ३ गतेदेखि लागु हुने गरी कार्यकारी परिषदबाट निर्णय गरेर अस्पतालमा सुत्केरी गराउन आउने महिला डिस्चार्ज भई घर जाने क्रममा १ हजार रूपैँया मात्र दिने निर्णय गरेको हो । प्रतिष्ठानले आफ्नो निर्णय भन्दै सुत्केरीले यसअघि पाउँदै आएको यातायात खर्चको रकम कटौती गरेको हो ।

अस्पतालमा सुत्केरी गराउन गरिब, निम्न आए भएका महिलाहरू आउने गर्छन् । दैनिक १० भन्दा बढी महिलाले प्रसूति सेवा प्राप्त गर्दै आएका छन् । प्रतिष्ठानले यो भन्दा अगाडि यातायात खर्चवापत २ हजार रूपैँया र नियमित गर्भ परीक्षण गरेकोमा ८ सय गरी कुल २८ सय रकम दिँदै आएको छ । प्रतिष्ठानले यातायात खर्च १ हजार दिएर सरकारसँग भने २८ सय दावी गर्दै आएको छ ।

प्रतिष्ठानमा सुत्केरीका लागि आएकी एक जना महिलाले आफूहरूले २ हजार यातायात खर्च पाउँदै आएकोमा यसरी बिना सूचना १ हजार मात्रै दिनुले गम्भीर प्रश्न खडा गरेको बताइन् । आमा सुरक्षा कार्यक्रम लागु भएपछि त्यो अनुसारको सेवा दिनुपर्ने उनीहरुको भनाई छ । प्रतिष्ठानमा कार्यरत एक जना महिला कर्मचारीले पनि केन्द्रबाट पत्राचार गरेको आफूहरूलाई थाहा नभएको, तर, प्रतिष्ठानले एकाएक यातायात खर्च कटौती गर्नु दुःखदायी काम भएको बताइन् ।