समिति गठनको टीओआरमा कार्यदलमा सहमति जुटेन

१० जेठ, काठमाडौं । सहकारीको रकम अपचलनबारे छानबिन गर्न गठन गर्ने भनिएको संसदीय समितिको टीओआर टुंगो लगाउन बिहीबार दिउँसो बसेको कार्यदलको बैठक निष्कर्ष नपुगि सकिएको छ । एक घण्टा एक ठाउँमा बसेर सत्तापक्ष र प्रतिपक्ष छुट्टाछुट्टै छलफलतिर लागेका छन् । 

कानून, न्याय तथा संसदीय मामिला मन्त्रालयमा एक घण्टा छलफलपछि सत्तापक्ष तीन जना एकातिर र कांग्रेसका दुई जना अर्कोतिर लागेका छन् । बेग्लाबेग्लै छलफल गर्न उनीहरु छुट्टिएका हुन् । अहिले सत्तापक्षका मन्त्री गिरीसहित एमालेका प्रमुख सचेतक महेश बर्तौँला र रास्वपा सांसद शिशिर खनाल छलफल गदैछन् । 

कांग्रेसका तर्फबाट सहभागी ज्ञानेन्द्र कार्की र जीवन परियार बेग्लै छलफलमा छन् । फेरी बस्ने भन्दै उनीहरु अलग भएका हुन् । बैठकमा सत्ता पक्षबाट कांग्रेसले माग गरेको विषयहरूमा एउटा मस्यौदाको ड्राफ्ट प्रस्तुत गर्ने र त्यसमा कांग्रेसले सहमति जनाए कार्यादेश टुंगो लाग्ने बताइएको छ ।

नेपाली कांग्रेसले उपप्रधानमन्त्री तथा गृहमन्त्री रवि लामिछानेको नाम उल्लेख गरी गृहमन्त्री मुछिएको सहकारी संस्थामा पनि संसदीय समितिले छानबिन गर्नुपर्ने अडान राख्दै आएको छ भने एमाले र रास्वपा त्यो कुरामा सहमत हुन नसक्दा सहमति जुट्न सकेको छैन ।