सगरमथा दिवसको अवसरमा ललितपुरमा बाल क्लाईम्बिङ प्रतियोगीता सम्पन्न

१० जेठ, काठमाडौं । सगरमाथा दिवसको अवसरमा ललितपुरका विभिन्न ठाउँमा बाल क्लाइम्बिङ्ग प्रतियोगिताको आयोजना गरिएको छ । ललितपुर महानगरपालिका, महालक्ष्मी नगरपालिका र गोदावरी नगरपालिकामा प्रतियोगिताको आयोजना गरिएको हो । 

गोदावरी नगरपालिकाको वडा नं. ८ अवस्थित गणेश माविका विद्यार्थीहरूबीच भएको प्रतियोगितामा ६० जनाले भाग लिएका थिए । प्रतियोगितामा पुरुष समूहबाट दीपेश दनुवार प्रथम, अरुण दनुवार दोस्रो र दीपेन्द्र दनुवार तेस्रो भएका थिए । त्यसैगरी महिलातर्फ सनशीला तामाङ प्रथम, सरिता(इन्द्र) दनुवार दोस्रो र मरियम थोकर तेस्रो भएकी थिइन् । विजेताहरूलाई नगद पुरस्कार, मेडल र प्रमाणपत्र प्रदान गरिएको थियो । 

त्यसैगरी  ललितपुर महानगरपालिका वडा नं. २६ को बालअधिकार समितिले स्पोर्ट्स क्लाइम्बिङ्ग खेल अन्तर्गत परिचयात्मक कार्यक्रमको आयोजना गरेको छ । धुम्बाराहीमा रहेको पासाङ ल्हामु क्लाइम्बिङ्ग सेन्टरमा बालबालिकाले बाल क्लाइम्बिङ्ग गरेर सगरमाथा दिवस मनाएका हुन् ।  

ललितपुर महानगरको वडा नं. २६ बाल अधिकार समिति, महालक्ष्मी नगरपालिका, शिक्षा, युवा तथा खेलकुद शाखाले एक–एक जना युवा र युवती गरेर महालक्ष्मी नगरपालिका अन्तर्गत प्रत्येक सामुदायिक विद्यालयका विद्यार्थीहरूलाई १ दिने परिचयात्मक क्लाइम्बिङ्ग कार्यक्रमको समेत आयोजना गरेको थियो । 

विश्वकिर्तिमानी सगरमाथा आरोही कल्पना महर्जनले सन् २०१९ को सफल सगरमाथा आरोहण गर्ने क्रममा ३ वटै नगरपालिकाको लोगो अंकित झण्डालाई सगरमाथाको चुचुरोमा आजको दिन पुर्याएको सम्झनामा प्रतियोगिताको आयोजना गरिएको हो ।