गृहमन्त्रीले लगाएको आरोप र लाञ्छनाबारे कांग्रेसले माग्यो प्रधानमन्त्रीको जवाफ

११ जेठ, काठमाडाैं । प्रमुख प्रतिपक्ष दल नेपाली कांग्रेसले सहकारी प्रकरणमा पार्टीले उठाएका विषयलाई सम्बोधन हुने गरि नै संसदीय छानविन समिति बनाउनुपर्ने जनाएको छ ।  

शुक्रबार प्रधानमन्त्री निवास बालुवाटारमा बसेको शीर्ष नेताहरुको बैठकमा कांग्रेसले मूलभुत रुपमा आफुहरुले उठाएका विषयलाई सम्बोधन हुने गरि छानबिन समिति बनाउनुपर्ने भन्दै भाषा जस्तोसुकै राखेपनि फरक नपर्ने जनाएको हो ।

बैठकपछि कांग्रेस प्रमुख सचेतक रमेश लेखकले संसदीय छानबिन समिति गठनका बिषयमा भएको छलफल सकारात्मक भएको जानकारी दिए । उनले स्वर्णिम, स्वर्णलक्ष्मीजस्ता सहकारीबाट गोर्खा मिडिया नेटर्वकमा पैसा गएको देखिएको भन्दै उक्त सहकारीका साथै सहकारीमा लाखौँको अर्बौं बचत अपचलन भएको बिषयमा छानबिन हुन जरुरी रहेको बताए  ।

छानबिन समितिको कार्यादेशमा गृहमन्त्रीको संलग्नता देखिएको कुरा सम्बोधन हुनुपर्ने भन्दै उनले भाषाले कुनै फरक नपर्ने जिकिर गरे । त्यस्तै लेखकले कैलाश सिरोहिया पक्राउ शैलीको विरोध गर्दै प्रधानमन्त्रीको ध्यानाकर्षण गराएको जानकारी दिए ।  

संसदमा गृहमन्त्रीले कांग्रेसप्रति लगाएको आरोप र लाञ्छनाका बारेमा पनि प्रधानमन्त्रीको ध्यानाकर्षण गराएको भन्दै उनले दुवै विषयमा प्रधानमन्त्रीको जवाफ चाहेको लेखकले बताए ।