कोलकाताले जित्यो आईपीएलको उपाधि

१४ जेठ, काठमाडौं । १७ औं संस्करणको इन्डियन प्रिमियर लिग (आईपीएल) २०२४ को उपाधि कोलकाता नाइट राइडर्सले जितेको छ । आइतबार राति भएको फाइनल खेलमा सनराइजर्स हैदरावादलाई ८ विकेटले पराजित गर्दै कोलकाताले उपाधि जितेको हो ।

हैदराबादले दिए एक सय १४ रनको लक्ष्य कोलकाताले १०। ३ ओभरमा दुई विकेट गुमाएर भेट्टायो । कोलकाताका वेंकटेश ऐरले सर्वाधिक अविजित ५२ रन जोडे । रहमनुल्लाह गुर्बाजले ३९ रन जोड्दा कप्तान श्रेयस ऐर ६ रनमा अविजित रहे ।

बलिङमा हैदरावादका कप्तान प्याट कमिन्स र शाहबाज अहमदले एकएक विकेट लिए । त्यसअघि टस जितेर पहिलो ब्याटिङ गरेको हैदरावाद १८ ओभर ३ बलमा १ सय १३ रनमा समेटिएको थियो ।

हैदरावादका कप्तान प्याट कमिन्सले सर्वाधिक २४ रन जोडे । अन्य ब्याटर क्रीजमा टिक्न सकेनन् । बलिङमा कोलकाताका आन्द्रे रसलले ३, हर्षित राना र मिचेल स्टार्कले २(२ विकेट लिए ।

कोलकाताका लागि यो तेस्रो उपाधि हो । यसअघि सन् २०१२ र २०१४ मा कोलकाताले आइपिएलको उपाधि जितेको थियो ।