कैलाश सिरोहियालाई थप तीन दिन थुनामा राख्न अदालतको अनुमति

१४ जेठ, जनकपुरधाम । जिल्ला अदालत धनुषाले कान्तिपुर मिडिया ग्रुपका अध्यक्ष कैलाश सिरोहियालाई थप तीन दिन हिरासतमा राखेर अनुसन्धान गर्न अनुमति दिएको छ । सोमबार न्यायाधीश यदुराज शर्माको एकल इजलासले सिरोहियालाई थप तीन दिन हिरासतमै राखेर अनुसन्धान गर्न प्रहरीलाई अनुमति दिएको हो ।

यसअघि २ पटक तीन/तीन दिन हिरासतमा राख्न अनुमति दिएको थियो । यो तेस्रो पटक पनि तीन दिन म्याद थप गरिए सँगै सिरोहिया कम्तीमा ९ दिन हिरासतमै रहने निश्चित भएको छ । गत शुक्रबार उच्च रक्तचाप, मुटुसम्बन्धी समस्या भएपछि सिरोहियो अस्पताल भर्ना भएका थिए ।

उनी अहिले पनि जनकपुर स्थित काव्या अस्पतालमा उपचाररत छन् । उनलाई सोमबार काब्या अस्पतालबाट एम्बुलेन्समा अदालतमा ल्याइएको थियो ।