विकल पौडेल अर्को भ्रष्टाचार मुद्दामा पनि दोषी ठहर

१४ जेठ, काठमाडौं । विशेष अदालतले सुरक्षण मुद्रण केन्द्रको कार्यकारी निर्देशक विकल पौडेललाई अर्काे भ्रष्टाचार मुद्दामा दोषी ठहर गरेको छ । सोमबार न्यायाधीश टेकनारायण कुँवर, रामबहादुर थापा र रितेन्द्र थापाको इजलासले झुटा विवरण पेस गरी भ्रष्टाचार गरेको अभियोगमा पौडेललाई दोषी ठहर गरेको हो 

विशेष अदालतले झुटा विवरण पेश गरेर सचिव सरहको पद लिएको आरोपमा १ वर्ष कैद र १० हजार जरिवाना हुने फैसला सुनाएको छ । विकलले आफ्नो अमेरिकाको स्थायी आवासीय अनुमतिपत्र रहेको कुरा ढाँटेर नेपालमा सरकारी सेवामा कार्यरत रहेको ठहर गर्दै उक्त सजाय सुनाएको हो ।

यसअघि गत मंगलबार मात्रै विशेष अदालतले सुरक्षण मुद्रण केन्द्रमा भएको भ्रष्टाचारमा दोषी ठहर गर्दै पौडेललाई दुई वर्ष कैद गरी उनीबाट २५ करोड ४७ लाख बिगो र त्यति नै असुल्ने फैसला गरेको थियो ।