प्रतिनिधि सभाबाट ७ सदस्यीय संसदीय छानबिन समिति घोषणा हुने, कांग्रेसले गर्यो सहमति अनुमोदन

१५ जेठ, काठमाडौं । सहकारी ठगी प्रकरणमा सम्लग्न भएकाहरुलाई कारवाही गर्नका लागि छानबिन गर्ने संसदीय समिति बनाउने विषयमा दलहरुबीच सहमति भएको छ । उक्त सहमतिअनुसार आज अपरान्ह ४ बजे बस्ने प्रतिनिधि सभाको बैठकबाट संसदीय छानबिन समिति गठन भएको घोषणा गरिने भएको छ ।  त्यसअघि मन्त्रिपरिषदको बैठकले समिति गठनको निर्णय गर्ने भएको छ । 

मंगलबार बिहान बसेको प्रमुख प्रतिपक्ष दल नेपाली कांग्रेस संसदीय दल बैठकले प्रमुख दलबीच भएको सहमतिलाई अनुमोदन गरेको बताएको छ । कांग्रेस प्रमुख सचेतक रमेश लेखकले प्रतिनिधिसभा बैठकबाट समिति गठन गरिने जानकारी दिए । समितिमा रहने सांसदहरूको नाम दिउँसो ३ बजेभित्र उपलब्ध गराइने उनले बताए ।

उनले कार्यदल बसेर केहीबेरमा कार्यादेश टुंग्याइने बताए । अब कार्यदलको बैठक बसेर अन्तिम रूप दिन्छ । आज बस्ने ४ प्रतिनिधिसभाको बैठकबाट कार्यादेश पारित हुनेगरी प्रस्तुत हुन्छ । हामी समितिमा बस्नेको नाम तीन बजेसम्ममा दिइसक्छौं, उनले भने । 

हिजो अबेरसम्म बालुवाटारमा बसेको बैठकमा सत्ता पक्ष र प्रमुख प्रतिपक्ष कांग्रेसबीच ७ सदस्यीय संसदीय छानबिन समिति बनाउने सहमति भइसकेको छ । जसमा एमाले र कांग्रेसबाट दुई/दुई जना, माओवादी, रास्वपा र राप्रपाबाट एक÷एक जना रहने छन् ।

कांग्रेस प्रमुख सचेतक रमेश लेखकले भने, ‘वैधानिकस्वरुप ४ बजेको संसदले दिन्छ । अहिले हामीले जुन सहमति गरेका छौँ । यो सहमितमा व्यक्तिको नाम र पद लेख्नुभन्दा पनि सहकारीको रकम जहाँ जहाँ गएको छ त्यहाँसम्म पुगेर त्यसमा संलग्न मानिस जो सुकै भएपनि छानिबन र अनुसन्धान गर्न सकिने भएकाले व्यक्तिको नाम लेख्न जरुरी छैन भन्ने निष्कर्षमा पुगेका हौँ ।;