सशस्त्रमा आईजीपी अर्याल विरुद्ध मोर्चाबन्दी !

१६ जेठ, काठमाडौं । सशस्त्र प्रहरी बलमा सशस्त्र प्रहरी महानिरीक्षक (आईजीपी) राजु अर्याल विरुद्ध मोर्चाबन्दी शुरु भएको बताइएको छ । एआईजी सीपी गौतमको नेतृत्वमा डीआईजी अञ्जनीकुमार पोखरेल, अभि खत्री लगायतको टीमले मोर्चाबन्दी शुरु गरेको सशस्त्र प्रहरी उच्च स्रोतको दावी छ । गत साता मात्रै स्टाफ कलेजमा हाजिर भएका डीआईजी पोखरेलले आफ्ना विरुद्ध आईजीपीले समाचार लेखाएको भन्दै एआईजी सीपी गौतमलाई गुनासो पोखेको दावी सो समाचार स्रोतको छ ।

स्रोतका अनुसार एआईजी गौतमले पनि आफू विरुद्ध आईजीपीले निरन्तर समाचार लेखाएको आरोप लगाएका थिए । त्यति मात्र होइन कानुन महाशाखाका एसएसपी युवराज अर्यालले यो विषयमा केही अधिकृतहरूसँग छलफल नै गरेका थिए । ‘आईजीपीको समाचार नआउने एआईजी डीआईजीहरूको मात्रै समाचार आउने ! को हो सूचना दाता ? भन्दै छलफल भएको थियो’, हल्चोक मुख्यालय स्रोतले भन्यो ।

इन्स्पेक्टरको पहिलो ब्याचको अधिकृत हुन् अञ्जनीकुमार पोखरेल । हाल उनी बराह बाहिनी सुनसरीका बाहिनीपतिबाट सिधै स्टाफ कलेज सानो गौचरणमा आइपुगेका छन् । मधेश प्रदेशको कमाण्ड गर्न दौडधूप गरिरहेका उनलाई स्टाफ कलेजमा सरुवा गरियो भनेर विभाग र आईजीपीप्रति गाली गर्ने र मोर्चाबन्दी गर्ने काममा उनी सरिक भएको आरोप लागेको छ । बराह बाहिनी छाड्नु अघि विभागमा राम्रो काम गर्न नहुने रहेछ भन्दै आफूभन्दा सिनियरलाई गाली गरेर उनी बिदा भएको स्रोतको भनाइ छ । लामो समय संयुक्त राष्ट्रसंघको मुख्यालयमा बसेर काम गर्ने अवसर पाएको भएपनि बराह बाहिनीमा बस्दा उनको व्यवहार कर्मचारी मैत्री बन्न सकेको थिएन ।

फिल्डमा त उनी निकै कमजोर देखिएका थिए । झापामा सशस्त्र प्रहरीका कर्मचारी सहकर्मीबाटै कुटिएको घटनाले उनको कमाण्ड क्षमता कमजोर देखिएको थियो । जून घटनाले उनको करिअरमै धक्का लाग्ने सम्भावना छ । घटनाको विषयमा एआईजीकै नेतृत्वमा उच्चस्तरीय छानबिन समिति गठन भएको थियो । बाहिनीबाट डीआईजी पोखरेलले नै घुमुवाको रुपमा खटाएका इन्स्पेक्टर नमप्रभात राई नेतृत्वको टोलीले झापाको सीमा क्षेत्रमा कार्यरत सशस्त्र प्रहरी जवानहरूमाथि कुटपिट गरी यातना दिएका थिए । कुटपिट गर्ने इन्स्पेक्टर राई लगायतको टोलीलाई निलम्बन गरी त्यतिबेला छानबिन गरिएका थियो । प्रारम्भिक छानबिनमै यो घटनामा बाहिनीको गल्ती देखिएको थियो ।

एकातर्फ संगठनको नीतिविपरीत डीआईजी पोखरेलले इन्सपेक्टरको नेतृत्वमा सादा पोशाकमा घुमुवा प्रहरी खटाएका थिए । अर्काेतर्फ राम्रोसँग डिउटी नगरेको भन्दै कुट्ने र खोलामा डुबाउने काम भएको थियो । अनुगमनका लागि खटाइएको अवस्थामा कसैले गल्ती गरेमा विभागीय कारबाही गर्ने नियमावलीमा उल्लेख छ । जिल्लाका एसपी तथा बीओपी इन्चार्जसँग समेत समन्वय नगरी भएको कुटपिट सुरक्षा निकायभित्रको एउटा गम्भीर घटना थियो  ।

सो घटनामा डीआईजी पोखरेल समेत कारबाहीमा पर्ने सम्भावना देखिएको थियो  । स्रोतका अनुसार कारबाहीमा परे पछि थप समस्या हुने भएपछि कारबाहीबाट जोगिन उनले छानबिन समितिका एआईजी गौतमलाई फकाएर आफ्नो गल्ती लुकाएका थिए । डीआईजी पोखरेललाई उनै एआईजी गौतमले जोगाएका थिए । जसका कारण अहिले आईजीपी विरुद्धको मोर्चाबन्दीमा गौतम र पोखरेलले एमाले र माओवादीका नेताहरूसँग कुराकानी गर्ने, सीपी गौतमलाई आईजीपी दिनुपर्ने भन्दै लविङ गर्न थालेको स्रोतको भनाई छ ।

आफूलाई भावी आईजीपीको दावी गर्ने पोखरेलले अर्का डीआईजी शम्भु सुवेदीलाई बाहिनीको चार्ज  बुझाउने बेला बाहिनीबाट १ सय ९ जना बिदामा रहेको जानकारी गराएका थिए । पहाडी गुल्मबाट कर्मचारी तानेर बाहिनी थुपारेका पोखरेलका कारण अहिले पुर्वी पहाडका गुल्महरू बेस क्याम्प जस्ता भएका छन् । सशस्त्र प्रहरी समाचार स्रोतका अनुसार अहिले गुल्ममा ५०÷५५ जना जनशक्ति पनि छैनन् । तर उनले धेरै जनशक्ति बाहिनीमा ल्याएर थुपारेको र बिदा छाड्ने गरेको खुलेको थियो ।

उनको बाहिनीमा २ सय ६ जना बढी जनशक्ति रहेको थियो । उनले एक वर्षसम्म एकै व्यक्तिलाई कोट मास्टर राखेर बढी भएको जनशक्तिलाई बिदा छाड्ने गरेको र लेखा अधिकृतसँगको सहकार्यमा मासिक १५ देखि २० लाख राशनवापत अनधिकृत रुपमा बुझ्ने गरेको बराह बाहिनीका एक सिनियर अधिकृतले नाम नबताउने शर्तमा नेपालबहसलाई बताए ।