२०८४ अगाडि नै संविधान संशोधन गरिनुपर्छः सिटौला

१६ जेठ, काठमाडौं । नेपाली कांग्रेस नेता कृष्णप्रसाद सिटौलाले २०८४ अगाडि नै संविधानमा नमिलेका कुराहरू संशोधन गरिनुपर्ने बताएका छन् । संविधान पुनरावलोकन गरेर नमिलेका र नपुगेको विषय वस्तुलाई सच्याएर जानुपर्ने उनको भनाइ छ । 

बुधबार काठमाडौँमा आयोजित गणतन्त्रका १६ वर्ष, नागरिकको अनुभूति, सुशासनको प्रत्याभूति विषयमा कार्यक्रममा उनले संविधान पुनरावलोकनको आवश्यकता देखाएका हुन् । आगामी निर्वाचनमा पुग्नुभन्दा अगाडि संविधानमा के–के सुधारको आवश्यक छ ? अध्ययन र समीक्षा गरी संविधानको पुनरावलोकनका लागि दलहरू तयार हुनुपर्ने उनीले बताए । 

उनले गणतन्त्रको १६ वर्षे अवधिको पनि मूल्याङ्कन गर्नुपर्ने बताए । पहिलो पाँच वर्ष खेर गयो । संविधान बनेपछि कार्यान्वयनका लागि राज्यका निकायले कसरी काम गरिरहेका छन् ? राज्य सञ्चलनका दृष्टिकोणले संविधानमा के के सच्याउनुपर्छ, के के थप्नुपर्छ नेपाली कांग्रेस र अरु दल तयार हुनुपर्छ, उनले भने । संविधानले नागरिकको पक्षमा काम गर्न कहाँ बाधा पुर्याएको छ त्यो हेरेर नागरिकको पक्षमा काम हुने गरी संविधानमा पुनरावलोकन गर्नुपर्ने उनले बताए । 
 
सरकारसँग जोडिएका निकाय र संवैधानिक परिषदले गरेका कामको पनि समीक्षा गर्न आवश्यक रहेको सिटौलाले बताए । ‘गणतन्त्र आएपछि सबै क्षेत्रका विकास भएको छ । तर संविधानको स्प्रीड अनुसार विकास भएको छैन,’ उनले भने । कांग्रेसको १५ औँ महाधिवेशनमा एउटा विचार बोकेर एकताबद्ध भई जानुपर्ने सिटौलाले बताए । ‘आगामी महाधिवेशन हुन एक–डेढ वर्ष बाँकी छ । आगामी महाधिवेशनमा एउटा विचार बोकेर एकताबद्ध भई जानुपर्छ । कांग्रेस जनतासँग जोडिन आवश्यक छ,’ उनले भने ।