संसदीय छानबिन समितिलाई ग्यालेक्सीमा १५ करोड बढी रकम गएको विवरण बुझाइँदै

१६ जेठ, काठमाडौं । मंगलबार प्रतिनिधि सभाले गठन गरेको ७ सदस्यीय छानबिन समितिलाई सहकारीका पीडितहरूले गृहमन्त्री रवि लामिछाने जोडिएको ग्यालेक्सी टीभीमा ऋण र विभिन्न प्रकारले गएको रकमबारे जानकारी गराउने भएका छन् । उनीहरुले समितिलाई जानकारी गराउन लागेको १५ करोडमाथि रकम अपचलन भएको विषय प्रहरी अनुसन्धानमा पनि उल्लेख भएको विषय हो । 

सुर्यदर्शन सहकारीका एक पीडितको भनाइअनुसार सुर्यदर्शन र सुप्रिम सहकारीबाट उजुरी दिँदा दावी गरिएको र हाल अदालतमा  विचाराधीन मुद्दामा किटान गरिएको रकम ग्यालेक्सी टीभीले लगेको कुरा विस्तृत रुपमा समितिलाई जानकारी गराउन लागिएको हो । ग्यालेक्सी टीभीले पोखराको सूर्यदर्शन र रुपन्देहीको सुप्रिम सहकारीबाट १५ करोडभन्दा बढी रकम लिएको प्रमाण भेटिएको छ । 

उनले भने, ‘२०८१ वैशाख ३ गते जिल्ला सरकारी वकिल कार्यालय रुपन्देहीले गरेको अभियोजनमा सुप्रिम सहकारीमार्फत १० करोड ९९ लाख ३६ लाख रुपैयाँ ग्यालेक्सी टीभीमा पुगेको देखाइएको थियो ।  पोखराको सूर्यदर्शन सहकारीमार्फत पाँच करोड रुपैयाँ ग्यालेक्सी टीभीमा गएको देखिएको छ । यो कुरा हामी समितिलाई जानकारी गराउने तयारीमा छौँ ।’

विभिन्न व्यक्तिका नाममा रकम ग्यालेक्सी टीभीमा पुगेको उनले बताए । त्यसबाहेक कालिमाटीको स्वर्णलक्ष्मी, वीरगन्जको सानो पाइला, चितवनको सहारा, बाँकेको समनता सहकारीमार्फत समेत करोडौं रुपैयाँ ग्यालेक्सीमा गएको पीडितहरुको अनुमान छ ।