डीआईजी र एसएसपी सरुवामा गृहमन्त्रीको मनोमानी, ५ महिना नपुग्दै लखेटिए आचार्य

१७ जेठ, काठमाडौं । बुधबार मन्त्रिस्तरीय निर्णयबाट नेपाल प्रहरीका तीन जना प्रहरी नायव महानिरीक्षक (डीआईजी)को सरुवा भयो । यो सरुवालाई लिएर प्रहरी प्रधान कार्यालयमा खैलाबैला चलेको छ । कसैको समय पुगिसक्दा पनि सरुवा हुँदैन, कोहीको भने गएको पाँच महिना नपुग्दै सरुवा हुन्छ । सरुवाको कुनै नीति भएन । संगठनमा काम गर्ने वातावरण बिग्रिएर गयो । मन्त्रीको सनकमा कति बेला कहाँ पुगिने हो, कसरी काम गर्ने ? यतिबेला प्रहरीहरूको व्यापक गुनासो हुने गर्छ । यहि लटमा गृहमन्त्रीले अवधि नपुगी २० जना एसएसपीको पनि सरुवा गरेका छन् । एसएसपी सरुवामा आर्थिक चलखेल भयो भनेर प्रहरी प्रधान कार्यालयभित्रै चर्चा चलिरहेको छ । 

गृह मन्त्रालयले तीन जना डीआईजीको सरुवा गरेपछि प्रहरी मुख्यालयमा यस्तो खैलाबैला मच्चिएको हो । मन्त्रिस्तरीय निर्णय भन्दै उनीहरुको सरुवा गरिएको हो । गृहमन्त्री भएदेखि नै प्रहरीमा हस्तक्षेप गरेर विवादित निर्णय गर्दै आएका रवि लामिछानेले बुधबार तीन जना डीआईजीको सरुवा गरे । तर, पनि विवादित नै भयो । यसरी सरुवा गर्दा मापदण्ड के हाे भन्ने प्रश्न संगठनभित्र उब्जिएको छ ।  

प्रहरी प्रधान कार्यालयले जारी गरेको विज्ञप्ति अनुसार डीआईजी रामदत्त जोशीलाई प्रहरी प्रधान कार्यालय विशेष ब्यूरोबाट त्रिभुवन अन्तर्राष्ट्रिय विमानस्थल सुरक्षा कार्यालय पठाइएको छ । कर्णाली प्रदेश प्रमुख लालमणि आचार्यलाई प्रहरी शिक्षालय भरतपुर काजमा खटाइएको छ । साइबर ब्यूरोबाट अर्जुन चन्द ठकुरीलाई कर्णाली प्रदेशमा पठाइएको छ । 

कर्णाली प्रदेशका प्रहरी प्रमुख डीआईजी लालमणि आचार्यलाई ५ महिना नपुग्दै सरुवामा परेका हुन् । सामान्यतया सरुवाका लागि एक वर्ष पुग्नुपर्छ । २०८० पुस २४ गते १६ जना डीआईजीको एकसाथ सरुवा गरिएको थियो । त्यतिबेला काठमाडौँ उपत्यका प्रहरी कार्यालय रानीपोखरीबाट कर्णाली प्रदेश प्रहरी कार्यालयमा सरुवा भएका आचार्यलाई ५ महिना नपुग्दै हटाइएको हो । उनीसँगै जिम्मेवारी पाएका अरू ६ प्रदेशका प्रहरी प्रमुखलाई चलाइएको छैन ।  

अर्जुन चन्द ठकुरीले फेरि पनि प्रदेश प्रहरी प्रमुखको जिम्मेवारी पाएका छन् । यसअघि विमानस्थलमा उनी सुरक्षा प्रमुख हुँदा अध्यागमन विभागका कर्मचारी र प्रहरीको विवाद भएको थियो । त्यसपछि बनेको छानविन समितिले प्रहरी नेतृत्वमाथि पनि प्रश्न उठाएको थियो । केही प्रहरीलाई कारबाही सिफारिस समेत गरिएको थियो । त्यसलगत्तै राजीनामा समेत बुझाएका चन्दलाई प्रहरी महानिरीक्षक बसन्त बहादुर कुँवरसहितका उच्च अधिकारीहरूले राजीनामा फिर्ता लिन सुझाव दिएका थिए । 

सरुवासँगै गृहमन्त्री लामिछानेले त्रिभुवन अन्तर्राष्ट्रिय विमानस्थलमा फेरि डीआईजीलाई नै खटाउने निर्णय गरेका छन् । डीआईजी रामदत्त जोशीलाई काजमा त्रिभुवन अन्तर्राष्ट्रिय विमानस्थल सुरक्षा कार्यालयमा खटाइएको छ । जोशी यसअघि नेपाल प्रहरी प्रधान कार्यालय विशेष ब्यूरोमा कार्यरत थिए । ब्यूरोबाट प्रदेश समन्वय विभागमा सरुवा गरिए पनि उनलाई काजमा विमानस्थल राखिएको हो ।  

यसैगरी हिजोकै मितिमा २० जना प्रहरी वरिष्ठ उपरीक्षक एसएसपीहरुको पनि अवधि नपुग्दै सरुवा गरिएको छ । चार महिना पनि नपुग्दै र बिना कारण एसएसपीहरुको सरुवा गरिएपछि प्रहरी संगठनमा कुन नीति, विधि र मापदण्डले काम गर्छ भन्ने कुरामा प्रहरीहरु रनभुल्लमा छन् । 

गृहमन्त्री स्तरीय निर्णय अनुसार विश्व अधिकारी आईजीपी सचिवालयमा आएका छन् भने ईश्वर कार्की मधेशप्रदेश कार्यालय जनकपुरबाट प्रहरी महानिरीक्षक मातहतको अन्वेषण महाशाखामा पुगेका छन् । त्यसैगरी दिनेश कुमार आर्चाय सीआईबीबाट लागूऔषध ब्यूरो प्रमुखमा सरुवा भएका छन् । एसएसपी अरुण पौडेल अख्तियार, डम्बर विक त्रिभुवन अन्तर्राष्ट्रिय विमानस्थल, रमेश कुमार बस्नेत लुम्बिनी प्रदेश प्रहरी कार्यालयबाट भैरहवा अन्तर्राष्ट्रिय विमानस्थल, दीप शमशेर जबरा प्रहरी युक्ति महाविद्यालय जर्गाह सिन्धुली सरुवा भएका छन् ।