स्वर्गद्वारी गुठी पीडित किसान र प्रहरीबीच झडप, चार जना घाइते

२० जेठ, काठमाडौं । दाङमा नापी र मालपोत कार्यालयमा तालाबन्दी गर्न गएका स्वर्गद्वारी गुठी पीडित किसान र प्रहरीबीच झडप हुँदा चार जना घाइते भएका छन् । दाङ प्रहरीका अनुसार घाइतेलाई राप्ती स्वास्थ विज्ञान प्रतिष्ठानमा उपचार गर्न लगिएको छ ।

स्वर्गद्वारी गुठी पीडित किसानहरुले आफूहरुका माग सम्बोधन नभएको भन्दै दाङको घोराहीमा रहेको मालपोत र नापी कार्यालयमा तालाबन्दी गर्न जादा प्रहरीले बल प्रयोग गरेपछि स्थिति तनावग्रस्त बनेको छ ।  प्रहरीले कार्यालय खुलाउने क्रममा तनावग्रस्त बनेको स्थितिलाई नियन्त्रणमा लिने क्रममा प्रहरीले अश्रुग्याँस पनि प्रहार गरेको जनाएको छ । 

प्रहरीका अनुसार अप्रिय घटना हुन नदिन १० राउन्ड अश्रुग्याँस प्रहार गरेको जनाएको छ । प्रहरीका अनुसार अहिले स्थति नियन्त्रणमा  आएको छ ।

सरकारले आफूहरुसँग पटक–पटक सम्झौता गरेपनि कार्यान्वयन नगरेका कारण दबाबस्वरुप नापी र मालपोत कार्यालयमा तालाबन्दी गर्न  गएको स्वर्गद्वारी गुठी पीडित किसानहरुले जनाएका छन् ।