ग्रेटर नेपालको नयाँ नक्सा सार्वजनिक

२० जेठ, काठमाडौं । ग्रेटर नेपाल राष्ट्रवादी मोर्चाले  वृहत्तर (ग्रेटर) नेपालको नयाँ नक्सा आइतबार सार्वजनिक गरेको छ । राजधानीमा आयोजित पत्रकार भेलामा नयाँ नक्सा सार्वजनिक गर्दै मोर्चाका अध्यक्ष फणीन्द्र नेपालले पूर्वमा ब्रह्मपुत्रदेखि पश्चिममा रावी नदीसम्मको भूभाग नेपालको आफ्नो जमिन  भएको  दावी गरे ।

ग्रेटर नेपालको इतिहासप्रति हामी किन गौरव गर्छौँ भने हाम्रा वीर पुर्खाले हामीलाई गौरवशाली इतिहास छोडेर गएका थिए, उनले भने, पुर्खाले आर्जेको भूभाग हाम्रो हो । अध्यक्ष नेपालले  पुर्खाको त्यो गौरव खास गरी हाम्रा पुर्खाको वीरतासँग जोडिएको छ, तिनले देशको माटोको सुरक्षा र प्रतिरक्षामा बगाएको पवित्र रगतसँग जोडिएको उल्लेख गर्दै  त्यही गौरवको गाथालाई ग्रेटर नेपाल राष्ट्रवादी मोर्चाले विगत डेढ दशकदेखि ग्रेटर नेपालको नक्सामार्फत् जीवन्त राख्ने प्रयास गर्दै आएको स्मरण गराए । माटोको मुद्दा सय, दुई सय वर्षमा सकिँदैन, हजार वर्ष पछिसम्म पनि जमिनमाथिको स्वामित्वको प्रश्न उठाउन सकिने अध्यक्ष  नेपालको भनाइ छ ।  

आइतबार जारी विज्ञप्तिमा नेपालसँग सुगौली सन्धि गर्ने संयुक्त अधिराज्य ग्रेट ब्रिटेन उक्त सन्धि भएको १२९ वर्षपछि Indian Subcontinent छाडेर गएको पनि अहिले ७५ वर्ष पुगिसकेको उल्लेख छ । ब्रिटेनले उपनिवेशमा राखेको नेपालको भूमिमा इन्डियाले पुनः उपनिवेश कायम गरेको पनि त्यति नै वर्ष पुगेको छ, तर नेपाल र इन्डियाबीच १९५० जुलाई ३१ मा भएको नेपाल–इन्डिया शान्ति तथा मैत्री सन्धिको धारा ८ अनुसार सुगौली सन्धि रद्द भई नेपालको सिमाना सुगौली सन्धिपूर्वकै अवस्थामा पुगिसकेको तथ्य दिनको घामजत्तिकै छर्लङ्ग छ । यसैका आधारमा ग्रेटर नेपाल राष्ट्रवादी मोर्चाले नयाँ नक्सा सार्वजनिक गरेको विज्ञप्तिमा भनिएको छ । 

ग्रेटर नेपालको नक्साको यो पाँचौँ संस्करण ऐतिहासिक तथ्य र अभिलेखमा आधारित रहेर तयार पारिएको हो । समुद्र गुप्तको अलाहबाद प्रशस्तिमा नेपालको पूर्वी सिमाना असम भएर बग्ने ब्रह्मपुत्र नदीको काखमा रहेको कामरूपसम्म भएको उल्लेख इन्डियाली इतिहासविद्हरूले गरेका छन् ।

 ग्रेटर नेपालको पश्चिमतर्फको सिमाना रावी नदी हो भन्ने कुरा डेभिड अक्टरलोनी र बडा काजी अमरसिंह थापाबीच १८१५ मे १५ मा भएको एक सम्झौतामा उल्लेख भएको पाइन्छ । दक्षिणतर्फको सिमाना निर्क्यौल गर्न अझै खोज अनुसन्धान गर्नुपर्ने देखिन्छ ।

नयाँ नक्सा अनुसार पूरा नेपालको ३३४२५० वर्ग किलोमिटर थप क्षेत्रफल भएको ग्रेटर नेपालले स्पष्ट पारेको छ । यो क्षेत्रफलमा अहिले इन्डियन शासन छ ।  ग्रेटर नेपालको नयाँ नक्सा सार्वजनिक समारोहमा काठमाडौं महानगर वडा नं ११ का अध्यक्ष हिरालाल तण्डुकार लगायत विभिन्न जानकार व्यक्तित्वहरुले आआफ्नो धारणा राखेका थिए ।