न्यूरोडमा सडक विभाग र नगर प्रहरीबीच झडपको स्थिति

२१ जेठ, काठमाडौं । काठमाडौंको न्यूरोड क्षेत्रको सडकलाई लिएर सडक विभाग र नगर प्रहरीबीचको विवादले तनावको रुप लिएको छ । काठमाडौं महानगरपालिकाले फुटपाथ विस्तारका लागि खनेको सडक सोमबार बिहान सडक विभागले पिच गर्न थालेको थियो । तर नगर प्रहरी पुगेपछि विवाद र तनाव उत्पन्न भएको हो । 

अहिले नगर प्रहरी र सडक विभागका अधिकारीहरुबीच पनि छलफल भइरहेको छ । न्यूरोडमा महानगरले भत्काएको पीच टाल्न पुगेका सडक विभागका मजदुरलाई रोक्न मेयर बालेन शाहका समर्थकको भिड लागेको छ । बालेनका समर्थकले सडक टाल्ने काममा अवरोध गरेपछि विवाद सिर्जना भएको हो । 

महानगरका प्रहरी पनि त्यहाँ आइपुगेका छन् । सडक विभागका प्रतिनिधि र महानगरका प्रहरीबीच पनि भनाभन भएको छ । मेयर बालेन शाहको निर्देशनमा जेठ १२ गते इन्द्रचोकदेखि जुद्धशालिकतर्फको बिशाल बजारअगाडि पीच काटिएको थियो । सडक डिभिजन कार्यालयले आफ्नो क्षेत्राधिकारको सडकमा हात हालेको भन्दै महानगरलाई दुई दिनभित्र जस्ताको तस्तै पार्न १६ गते अल्टिमेटम दिएको थियो । 

महानगरले नबनाएपछि सडक विभागले आज कर्मचारी र मजदुर खटाएर काटिएको सडक टाल्न सुरू गरेको छ । फुटपाथ बढाउन भन्दै महानगरले सडक काट्ने क्रममा डिभिजन कार्यालयले हस्तक्षेप गरेपछि दुई निकायबीच टकराव बढेको छ ।