गाँजा खेती, घरेलु मदिरा र हनिमुन सिटीलाई ब्राण्डिङ गरेर जाऊ, भनेजति राजश्व उठ्छः गुरुङ

२१ जेठ, काठमाडौं । नेपाली कांग्रेसका नेता एवं सांसद धनराज गुरुङले बजेटले निर्धारण गरेको १२ खर्ब ६० अर्ब राजस्व उठाउन गाँजा खेती र घरेलु मदिरालाई प्रोत्साहन गर्नु पर्ने बताएका छन् । राजश्व कसरी उठाउन सकिन्छ भन्ने विषयमा गाँजा र घरेलु मदिराका बारे सकारात्मक व्याख्या र छलफल हुनुपर्ने उनको भनाइ छ ।  

सोमबारको प्रतिनिधिसभा बैठकमा आर्थिक वर्ष २०८१/०८२ को राजस्व र व्ययको वार्षिक अनुमानमाथिको छलफलमा उनले आफू कानुन मन्त्री हुँदैको बखत गाँजा खेतीका विषयमा कानुन बनाउन पहल गरेको भन्दै गाँजा खेती गरेर औषधिजन्य उत्पादन गर्नुपर्ने भन्दै गाँजा खेती बन्द गर्ने कार्य सय प्रतिशत गलत भएको बताए । मन्त्री हुँदा पटकपटक कानुन बनाएर ल्याउनुहोस् भन्दा ल्याउनुभएन । यदि कानुन बनाएर जाने हो भने गाँजा खेतीबाट दुई खर्ब राजस्व वृद्धि हुन्छ, उनले भने । 

घरेलु मदिरासम्बन्धी कानुन बनाएर ब्रान्डिङ गर्न सके दुई खर्ब राजस्व उठ्ने भन्दै कानुन नबनाउने तर, हात फैलाउन भने तयार हुने भन्ने प्रश्न उनको थियो । जडिबुटीको खेतीको विषयमा पनि कानुन बनाउन सके राजस्व संकलन वृद्धि हुने उनको भनाइ थियो । यसबाट पनि थप दुई खर्ब राजस्व उठ्ने उनको दाबी थियो । यदि यसरी जाने हो भने १२ होइन १९ खर्बभन्दा बढी राजस्व उठ्ने उनले दावी गरे । 

गुरुङले धार्मिक, सांस्कृतिक, खेलकुदलगायत पर्यटनको सम्भावना रहेको बताए । उनले जनकपुरमा विवाह हब, लुम्बिनीमा वर्थिङ हब बनाउने भए हनिमुन सिटी पनि थप गर्नुपर्ने उल्लेख गरे । हनिमुन हबको कमी भयो । कही न कही बनाऊ । चितवनको सौराहालाई हनिमुन सिटी बनाऊ ।