न्युरोड सडकः महानगरले खन्यो, डिभिजनले टाल्यो

२१ जेठ, काठमाडौं । सडक डिभिजन कार्यालय, काठमाडौंले काठमाडौं महानगरपालिकाले फुटपाथ बनाउन भन्दै काटेको सडक कालोपत्रे गरेको छ । सोमबार बिहानैदेखि सडक डिभिजन कार्यालयका कर्मचारी न्युरोडको जुद्ध सालिकदेखि इन्द्रचोकसम्मको सडक कालोपत्रे गर्न खटिएका छन् ।

महानगरले काटेर अलपत्र र अस्तव्यस्त भएपछि सडक कालोपत्रे गरिएको कार्यालयले जानकारी दिएको छ । सडक विभागले पिच शुरु गरेपछि महानगर प्रहरी सो क्षेत्रमा गएर काम रोक्न प्रयास गरेको थियो । अहिले केही स्थानीयहरू महानगरको योजनाको विरुद्ध देखिएका छन् भने महानगरले काम रोक्न प्रयास गरिरहेको छ ।

यस अघि एमाले सम्बद्ध स्थानीयले महानगरको फुटपाथ बनाउने योजनामा अवरोध गरेको भन्दै मेयर बालेन शाहले एमाले अध्यक्ष केपी शर्मा ओलीलाई गिरिबन्धुमा गरेको नीतिगत भ्रष्टाचारको विषयलाई विषयान्तर गर्न न्युरोडको फुटपाथ बनाउने योजनाको विरोध गरेको आरोप लगाएका थिए ।