जनमतले अवरोध गर्यो प्रदेश सभा बैठक

२१ जेठ, जनकपुर । जनमत पार्टीले छानबिन समितिको माग गर्दैम मधेश प्रदेश सभा बैठक अवरोध गरेको छ । जनमत पार्टीले राजविराजस्थित कृषि विश्वविद्यालयको शिलान्यास कार्यक्रममा भएको कुटपिटको घटनालाई लिएर संसदीय छानबिन समितिको माग गर्दै प्रदेश सभाको बैठकमा अवरोध गरेका हुन् ।

जनमत पार्टीको अवरोधपछि सभामुख रामचन्द्र मण्डलले सोमबार अपराह्न बसेको प्रदेश सभाको बैठक १० मिनेटका लागि स्थगित गरेका छन् । जनमत पार्टीका प्रमुख सचेतक सञ्जयकुमार यादवले कृषि विश्वविद्यालय शिलान्यास कार्यक्रममा आफ्ना पार्टीका तत्कालीन मन्त्री महेशप्रसाद यादवमाथि मुख्यमन्त्री सरोजकुमार यादवकै उपस्थितिमा आक्रमण भएको भन्दै छानबिन समितिको माग गरे ।

मधेश प्रदेश सरकारबाट एमाले–माओवादी बाहिरिएपछि अल्पमतमा परेको मुख्यमन्त्री यादवको सरकारले विश्वासको मत लिन बैठक आह्वान गरेको छ । सत्ताको बागडोर सम्हाल्न दलहरुबीच रस्साकस्सी रहेकै बेला विश्वासको मत, नीति तथा कार्यक्रम र बजेट ल्याउन बोलाइएको प्रदेश सभाको बैठक अर्थपूर्ण छ ।