फेरी मन्त्रिपरिषद पुनर्गठन गर्दे प्रधानमन्त्री प्रचण्ड, रञ्जिता श्रेष्ठ पर्यटनमन्त्री बन्दै

२१ जेठ, काठमाडौं । प्रधानमन्त्री पुष्पकमल दाहाल प्रचण्डले मन्त्रिपरिषद् पुनर्गठनको तयारी गरेका छन् । हालै मात्र विश्वासको मत लिएका प्रधानमन्त्री प्रचण्डले आफूलाई विश्वासको मत दिने दलहरू नागरिक उन्मुक्ति पार्टी (नाउपा) र जनमत पार्टीलाई सरकारमा सहभागी गराउन मन्त्रिपरिषद् पुनर्गठन गर्न लागेका हुन् । नाउपालाई संस्कृति, पर्यटन तथा नागरिक उड्डयन मन्त्रालय र  जनमतलाई उद्योग वाणिज्य तथा आपूर्ति मन्त्रालय दिने प्रधानमन्त्रीको तयारी छ । 

 नागरिक उन्मुक्तिबाट अध्यक्ष रञ्जिता श्रेष्ठ आफैं सरकारमा जाँदैछिन् । आफू संस्कृति, पर्यटन तथा नागरिक उड्डयन मन्त्रालय लिएर सरकारमा जाने निश्चित भएको अध्यक्ष श्रेष्ठले बताइन् । नाउपालाई एउटा मन्त्रालय र अर्को राज्यमन्त्री दिने सहमति भएको उनले बताइन् । उनले भनिन्, ‘पर्यटन मन्त्रालय लिएर म आफैं जाँदैछु । अर्को कसलाई बनाउने भन्ने टुंगिएको छैन ।’  यसैगरी उद्योग वाणिज्य तथा आपूर्ति मन्त्रालय लिएर जनमत पार्टी पनि सरकारमा सहभागी हुने बताइएको छ ।  जनमत र नाउपा सरकारमा जान तयार भए प्रचण्डले तत्काल दुई जना मन्त्री सरकारबाट फिर्ता बोलाउनुपर्ने हुन्छ । त्यसैले सत्ता सहकार्यमा रहेका प्रमुख घटकहरुसँग छलफल गरेर प्रधानमन्त्रीले मन्त्रिपरिषद् हेरफेर गर्न लागेको बताइन्छ ।