पर्सामा सदस्यता विवाद नसच्चिएसम्म पत्रकार महासंघको चुनाव हुन नदिने चेतावनी

२२ जेठ, वीरगन्ज । नेपाल पत्रकार महासंघको सदस्यता विवाद समाधान नभएसम्म पत्रकार महासंघको पर्सामा निर्वाचन हुन नदिने सक्रिय चार संघ संगठनले चेतावनी दिएका छन् ।

प्रेस चौतारी नेपाल पर्सा, नेपाल प्रेस युनियन पर्सा, समाजवादी प्रेस संगठन पर्सा र प्रेस मञ्च नेपालले मंगलबार  संयुक्त विज्ञप्ति जारी गर्दै यस्तो चेतावनी दिएका हुन् । पत्रकार महासंघ केन्द्रीय कार्यसमितिले जिल्ला शाखा र प्रदेश शाखाले सिफारिस गरेको सदस्यताको नामावलीलाई लत्याएर चोर बाटोबाट सदस्यताको नामावली जारी गरेको आरोप उनीहरुले लगाएका छन् ।

केन्द्रीय कार्यसमितिले कुनै अमुक व्यक्ति र संस्थाको प्रभावमा परेर महासंघको विधान नै मिचेर सदस्यताको नाम थपघट गरेर जारी गरेको नामावली सूची नसच्याए सम्म पर्सा शाखाको निर्वाचनको कुनै पनि प्रकृया सुरु नगर्न पनि उनीहरुले आग्रह गरेका छन् । यदि नामावली नसच्याइ निर्वाचनको प्रकृया सुरु गरिएमा त्यसबाट सृजित हुने प्रतिकूल परिस्थितिको जिम्मेवार केन्द्रीय कार्यसमिति हुने चेतावनी उनीहरुले दिएका छन् ।

विज्ञप्तिमा नेपाल प्रेस युनियन पर्साका अध्यक्ष विजय चौहान, प्रेस चौतारी नेपाल पर्साका अध्यक्ष तुलसी भण्डारी, समाजवादी प्रेस संगठन पर्साका अध्यक्ष शम्भु सुमन र प्रेस मञ्च नेपालका केन्द्रीय उपाध्यक्ष वीरेन्द्र साह हिटलरले हस्ताक्षर गरेका छन् ।