केरलको वायनाड र उत्तर प्रदेशको रायबरेली दुवै क्षेत्रमा विजयनजिक पुगे राहुल गान्धी

२२ जेठ, काठमाडौं । भारतीय कांग्रेसका नेता राहुल गान्धी दुवै क्षेत्रमा विजय नजिक पुगेका छन् ।  केरलको वायनाड ३ लाख ६० हजारभन्दा बढी मतान्तरले अगाडि रहेका उनी उत्तर प्रदेशको रायबरेली ३ लाख ८८ हजार बढी मतान्तरले अगाडि रहेका छन् । दुवै क्षेत्रमा गान्धी ३ लाखभन्दा बढी मतको अन्तरले विजयी हुने देखिएको छ । 

गान्धी सन् २०१९ मा वायनाडबाट विजयी भएका थिए भने उत्तर प्रदेशको अमेठीमा भने भाजपाकी स्मृति इरानीसँग पराजित भएका थिए । यसपल्ट इरानी अमेठीमा कांग्रेस नेता किशोरीलाल शर्मासँग पछाडि परेकी छिन् । राहुल गान्धी वायनाडमा भारतीय कम्युनिस्ट पार्टीकी एनी राजाभन्दा ३ लाख ६० हजारभन्दा बढी मतान्तरले अगाडि रहेका छन् । गान्धीले ६ लाख ४१ हजार ७ सय २५ मतसहित अग्रता बनाएका छन् ।

त्यस्तै उत्तर प्रदेशको रायबरेलीमा गान्धी भाजपाका दिनेशप्रताप सिंहभन्दा ३ लाख ८८ हजार बढी मतान्तरले अगाडि रहेका छन् । गान्धीले ६ लाख ८४ हजार मत ल्याउँदा सिंहले २ लाख ९५ हजार मत ल्याएका छन् ।

उत्तर प्रदेशको अमेठीबाट कांग्रेस नेता राहुल गान्धी ३ पटक सांसद बनेका थिए । पछिल्लो पटक सन् २०१९ मा भने उनले अमेठीमा हार बेहोरेका थिए । २००४,२००९ र २०१४ मा अमेठीबाट जित हात पारेका राहुललाई भारतीय जनता पार्टीकी नेता स्मृति इरानीले ५५ हजार मतान्तरले हराएकी थिइन् ।

भारतीय निर्वाचन आयोगका अनुसार भाजपा नेतृत्वको एनडीए गठबन्धन बहुमतभन्दा अगाडि देखिएको छ । एनडीए गठबन्धन २९३ स्थानमा अगाडि रहँदा कांग्रेस नेतृत्वको इन्डिया गठबन्धन भने २३३ स्थानमा रहेको छ ।