लोकसभा निर्वाचनमा वारणासीबाट नरेन्द्र मोदी विजयी, मत भने पहिलेको भन्दा कम

२२ जेठ, काठमाडौं । भारतीय प्रधानमन्त्री नरेन्द्र मोदी वारणासीबाट विजयी भएका छन् । भारतमा भएको लोकसभा निर्वाचन–२०२४ मा भारतीय प्रधानमन्त्री मोदी उत्तर प्रदेशको वाराणसीबाट तेस्रोपटक लोकसभाका लागि विजयी भएका हुन् ।

यसपटक उनी सबैभन्दा कम मतान्तरले विजयी भएका छन् । उनले प्रतिस्पर्धी राष्ट्रिय भारतीय कांग्रेसका उमेदवार अजय रायलाई डेढ लाख मतको अन्तरले हराएका छन् । अघिल्ला दुई निर्वाचनको तुलनामा यसपटक उनको मतान्तर कम देखिएको हो । यसपटक मोदीले अघिल्लो सन् २०१९ मा प्राप्त गरेको मतभन्दा कम मत पाएका छन् ।

सन् २०१९ मा मोदीले ६ लाख ७४ हजार ६६४ मत प्राप्त गरेका थिए । यसपटक उनले ६ लाख ११ हजार ४३९ मत प्राप्त गरेका छन् । अघिल्लो निर्वाचनमा कांग्रेसका रायले एक लाख ५२ हजार ५४८ मत प्राप्त गरेका थिए । यसपटकको निर्वाचनमा भने उनले चार लाख ५९ हजार ८४ मत प्राप्त गरेका छन् ।

यसपटकको लोकसभा निर्वाचनमा मोदीले रायलाई एक लाख ५२ हजार ३५५ मतले हराए । सुरूवातमा प्रधानमन्त्री मोदी १० हजार भोटले पछि परेका थिए । तर, पछि मोदीले अग्रता लिन थालेका थिए । वारणासीमा मोदी सन् २०१४ देखि निर्वाचित हुँदै आएका छन् । सन् २०१९ मा यहाँ मोदीले ६ लाख ७४ हजार भन्दा बढी मत पाएका थिए ।