भारतमा मोदी तेस्रोपटक प्रधानमन्त्री बन्दै, भाजपा गठबन्धनले पायो बहुमत

२४ जेठ, काठमाडौं । भारतीय लोकसभा निर्वाचन–२०२४ को मतगणना सम्पन्न भएको छ । निर्वाचन आयोगका अनुसार कुल ५४३ सिटमा भएको निर्वाचनमा भाजपा नेतृत्वको सत्ता गठबन्धन (एनडीए)ले २९३ सिट जितेको छ भने कांग्रेस नेतृत्वको विपक्षी गठबन्धन (इण्डिया) गठबन्धनले २३१ सिट जितेको छ । भाजपाले मात्रै जितेको सिट संख्या २४० हो भने कांग्रेस एक्लैले ९९ सिट जितेको छ । त्यसैगरी समाजवादी पार्टी (सपा)ले ३७, त्रिणमुल कांग्रेस (टीएमसी)ले २९ सिट जितेको छ ।

बहुमतका लागि २७२ सिट जित्नुपर्ने भए पनि कुनै पनि दलले एकल बहुमत हासिल गर्न सकेनन् । भाजपा सबैभन्दा ठूलो दल बनेकाले उसैको नेतृत्वमा गठबन्धन सरकार बन्ने हुँदा नरेन्द्र मोदी नै प्रधानमन्त्री बन्नेछन् ।  मोदीले तेस्रोपटक पनि बहुमत दिएको भन्दै जनतासँग आभार प्रकट गरेका छन् ।

सामाजिक सञ्जाल एक्समा उनले लेखेका छन्, ‘देशका जनता जनार्दनले एनडीए माथि लगातार तेस्रो बार आफ्नो विश्वास व्यक्त गरेका छन् । भारतको इतिहासमा यो अभूतपूर्व क्षण हो । ‘म देशवासीलाई यो विश्वास दिलाउँछु कि उनीहरुको आकांक्षा पूरा गर्नका लागि नयाँ ऊर्जा, नयाँ उमंग र नयाँ संकल्पका साथ अघि बढ्ने छौं ।’