अन्तर्राष्ट्रिय मुद्रा कोषले बजेटरी सहायता शीर्षकमा राखेर खर्च गर्ने गरी नेपाललाई ५ अर्ब ५९ करोड दिने

२४ जेठ, काठमाठौं । अन्तर्राष्ट्रिय मुद्रा कोष (आईएमएफ) ले नेपाललाई दिने विस्तारित कर्जा सुविधा अन्तर्गतको चौथो किस्ता उपलब्ध गराउने भएको छ । यस बापत ५ अर्ब ५९ करोड रुपैयाँ उपलब्ध हुनेछ । आईएमएफका नेपाल मिसन प्रमुख डा. टिडियान किन्डाको नेतृत्वको टोलीसँग यस्तो सहमति भएको अर्थ मन्त्रालयले जानकारी दिएको छ ।

आईएमएफको कार्यकारी बोर्डले कोरोना महामारीको समयमा २०७८ पुसमा नेपाललाई ईसीएफअन्तर्गत चार वर्षभित्र ३९ करोड ८८ लाख अमेरिकी डलर निब्र्याजी कर्जा दिने निर्णय गरेको थियो । त्यसमध्ये यसअघि नै तेस्रो किस्ता निकासा भइसकेको छ भने अन्तिम अर्थात् चौथो किस्ताबापत ४ करोड २० लाख अमेरिकी डलर अर्थात ५ अर्ब ५९ करोड रुपैयाँ उपलब्ध गराउन बाँकी छ ।

विस्तारित कर्जा सुविधाको प्रत्येक किस्ता रकम निकाशा गर्नुअघि कोषले यसअघिको प्रतिबद्धताको समीक्षा गर्ने गरेको छ । सोही समीक्षाका लागि कोषको मिसन नेपाल आएको हो । नेपालको आर्थिक स्थायित्व, सुशासन र वित्तीय अनुशासनलाई प्राथमिकतामा राखेर यो रकम दिन लागिएको हो । नेपालको अर्थतन्त्र सुधार र आर्थिक स्थिरताका लागि  आईएमएफले सहयोग गर्दै आएको छ । 

आईएमएफ कार्यकारी बोर्डले विस्तारित ऋण सुविधाको समीक्षा पूरा हुने चरणमा रहेकाले बाँकी रकम छिट्टै निकाशा गर्ने जानकारी दिएको छ । उसले नेपालले वित्त र मौद्रिक नीतिको सुधार तथा वित्तीय अनुशासन कायम गर्ने विषयमा राम्रो प्रगति गरेको बताएको छ । 

आईएफएफले संरचनात्मक तथा नीतिगत सुधारका क्षेत्र तथा मध्यमअवधिको भुक्तानी सन्तुलन, आन्तरिक राजस्व परिचालन, सार्वजनिक लगानी व्यवस्थापन र वित्तीय जोखिम घटाउन ईसीएफ फण्डमार्फत विभिन्न मुलुकलाई आर्थिक सहायता प्रदान गर्दै आएको छ । विस्तारित कर्जा सुविधा (ईसीएफ) अन्तर्गतको उक्त रकम नेपालले बजेटरी सहायता शीर्षकमा राखेर खर्च गर्दै आएको छ ।